Bir necha oy davom etgan bahs-munozaralardan so‘ng Germaniya kansleri Olaf Shols Ukrainaga Leopard tanklarni yetkazib berishga qaror qildi. Bu haqda Spiegel xabar berdi.
Ma’lum qilinishicha, gap Leopard 2A6 tanklarining kamida bitta rotasi haqida ketmoqda. Berlin boshqa davlatlar tomonidan Leopard tanklari yetkazib berilishini ham ma’qullamoqchi. Leopard tanklari Ukrainaga Bundesver zaxiralaridan ajratiladi. O‘rta va uzoq muddatli istiqbolda yangi jangovar tanklar sanoat zaxiralaridan Ukrainaga yuborilishi mumkin.
Yaqinda Ukrainaga Leopard jangovar tanklarini yetkazib berish uchun Sholsga bosim kuchaygandi. Kansler Leopard’ni AQSHning Abrams tanklari bilan bir vaqtda Ukrainaga yuborishga chaqirgan. Shols o‘z sharti haqida AQSH prezidenti Jo Bayden bilan suhbatda gapirgan, biroq Bayden Abrams tanklarini Ukrainaga yuborish niyatini tasdiqlamagan.
Wall Street Journal rasmiylarga tayanib, AQSH prezidenti maʼmuriyati Germaniyaning Leopard tanklarini Kiyevga yetkazish boʻyicha pozitsiyasi tufayli Ukrainaga Abrams M1 tanklarini yuborishga moyilligi haqida yozgandi. Yuboriladigan tanklar soni aniqlanmagan. Hozirda Bayden ma’muriyati Ukrainaga Abrams tanklarini yetkazib berishni ko‘rib chiqmoqda.
AQSH hukumati og‘ir Abrams tanklarini (og‘irligi 55 tonna) texnik sabablarga ko‘ra Kiyevga yuborishni ma’qullamayapti — tanklarning gaz turbinali dvigatellari juda katta miqdorda yonilg‘i sarflaydi, buzilishlarga moyil va ularga texnik xizmat ko‘rsatish uchun yuqori malakali xodimlar kerak.
Leopard dunyodagi eng yaxshi jangovar mashinalardan biri hisoblanadi. Bundan tashqari, u sovet T-72 tankiga raqobat tarzda ishlab chiqilgan.
Mavzuga doir: Nega Ukraina Germaniyadan aynan Leopard tanklarini so‘ramoqda? U qanday ahamiyatga ega?
Izoh (0)