Consensus Economics ekspertlari 2023-yilda Yevropa iqtisodiyotida retsessiya o‘rniga iqtisodiy o‘sish yuz berishini prognoz qilmoqda. Bu haqda Financial Times xabar bermoqda.
Consensus Economics hisobotida qayd etilishicha, global iqtisodiyotning o‘sishiga energiya xarajatlarining pasayishi, Yevropa hukumatlarining qo‘llab-quvvatlash choralari, shuningdek, Xitoyda koronavirus cheklovlarining bekor qilinishi yordam bermoqda.
Dekabr oyida Consensus Economics ekspertlari bu yil yevrohudud retsessiyaga tushib qolishini prognoz qilgan edi qilishgan. Biroq yanvar so‘rovi 2023-yil davomida mintaqa iqtisodiyoti 0,1 foizga o‘sishini ko‘rsatdi.
UBS iqtisodchisi Anna Titarevaning fikricha, retsessiya ehtimoli o‘tgan yozdagi 90 foizga nisbatan 30 foizgacha kamaygan. Uning so‘zlariga ko‘ra, Yevropa gaz omborlarini to‘ldirish yevrohududning iqtisodiy barqarorligiga hissa qo‘shgan.
Barclays Bank iqtisodchisi Silviya Ardanyaning ta’kidlashicha, Yevropa iqtisodiyotidagi pasayish ilgari o‘ylangandek kuchli bo‘lmasa-da, mintaqa yalpi ichki mahsuloti joriy yilning ikki choragida ham pasayadi.
Goldman Sachs investitsiya banki tahlilchilari esa Yevropa iqtisodiyoti retsessiyadan qutila oladi deb hisoblamoqda. Ularga ko‘ra, 2023-yilda Yevropa Ittifoqi yalpi ichki mahsuloti 0,6 foizga o‘sadi.
Yanvar oyida Jahon banki joriy yil uchun global iqtisodiy o‘sish prognozini keskin pasaytirdi. Ular 2023-yilda global yalpi ichki mahsulot 1,7 foizga o‘sishini kutmoqda.
Izoh (0)