Ukraina prezidenti Vladimir Zelenskiy Germaniya kansleri Olaf Sholsni Kiyevga Leopard 2 tanklarini yetkazib berish masalasida AQSHning fikriga tayanayotgani uchun tanqid qildi.
Avvalroq Shols AQSH Kiyevga Abrams tankalrini yetkazib bersagina Leopard 2 tankalrini yuborishga ruxsat berishini aytgandi.
“Bunday qilish, ya’ni sen qancha qilsang, men ham shuncha qilaman deyish, Amerika nimadir qilsa, men ham shunday qilaman deyish — noto‘g‘ri”, — dedi Zelenskiy Germaniyaning ARD telekanaliga bergan intervyusida Sholsning gaplarini nazarda tutib.
Uning fikricha, agar bu mavzu bo‘yicha “siyosiy iroda bo‘lmasa”, “bahona qidirish kerak emas”. “Shunchaki ‘yo‘q’ deyish kerak, kimdir hali tayyor emasligini aytish kerak emas”, — deya o‘z fikrini bayon qildi Zelenskiy. Shu bilan birga, u shu paytgacha ko‘rsatilgan yordam uchun Germaniya kansleriga minnatdorlik bildirdi.
Olaf Shols Ukrainaga tanklar yetkazib berish bo‘yicha qaror qabul qilishda AQSH prezidenti Jo Baydenning pozitsiyasiga tayanayotgani haqida Politico o‘z manbalariga tayanib xabar bergandi. Germaniya hukumati Ukrainaga Leopard tanklarini yuborish haqidagi muhokamalar tafsilotlarini oshkor etishdan rasman bosh tortmoqda. Bloomberg Germaniya tanklarni yetkazib berish qarori haqida shu hafta e’lon qilishini yozgandi.
Izoh (0)