Qozog‘iston birinchi prezidenti Nursulton Nazarboyev kasalxonaga tushgani haqida OAVlar “Xabar 24” sobiq direktori Aleksandr Aksyutitsning Facebook’dagi postiga tayanib xabar bermoqda.
Uning qayd etishicha, Nazarboyevning yuragi operatsiya qilinishi mumkin.
Biroq “Orda.kz” prezident ishlari boshqarmasi kasalxonasiga Nursulton Nazarboyev kelib tushmaganini ma’lum qildi.
Qozog‘iston birinchi prezidenti 1940-yil 6-iyul kuni tug‘ilgan bo‘lib, ayni paytda 82 yoshda.
2021-yil oxirrog‘ida bergan intervyusida Nazarboyev umurtqasini operatsiya qildirgani davlat rahbari lavozimidan ketishining sabablaridan biri ekanini tan olgandi. “Avval bu haqda umuman gapirmaganman, bu o‘ziga xos shovshuvli yangilik bo‘ladi. Men umurtqamni, belimni operatsiya qildirganman va jarrohlik amaliyoti ancha jiddiy edi”, — deya hikoya qilgan Nazarboyev “Xabar” telekanalida 2021-yil 21-oktabr kuni efirga berilgan “Portretga chizgilar” hujjatli filmida.
Nazarboyev sog‘lig‘i bilan bog‘liq muammolar katta ommaviy tadbir vaqtida 2011-yilda kuzatila boshlagani haqida ham gapirgan.
Nursulton Nazarboyev 2019-yil 19-mart kuni prezidentlik lavozimidan ketishi haqida e’lon qilgan va ertasi kuni davlat rahbari sifatida o‘z vakolatlaridan voz kechishi haqidagi farmonni imzolagan.
Eslatib o‘tamiz, Qozog‘istonda Majlis (parlament) deputatlari birinchi prezident to‘g‘risidagi qonun o‘z kuchini yo‘qotgan deb topdi. Qonun Qozog‘iston sobiq prezidenti Nursulton Nazarboyevga “elboshi” maqomini berib, uni umrbod imtiyoz va kafolatlar bilan ta’minlardi.
Izoh (0)