Turkmaniston armiyasi ham Markaziy Osiyoda kuzatilayotgan anomal sovuqqa tayyor emasligi ma’lum bo‘ldi, deya xabar berdi Turkmen news.
Turkmanistonda havo harorati -25 va undan past darajaga tushmoqda. Bu ko‘plab aholi punktlari uchun rekord daraja hisoblanadi.
“Aksariyat harbiy qismlarda issiq dush ham yo‘q. Askarlar ota-onalariga ommaviy qo‘ng‘iroq qilib, shamollash va grippga chalinganidan shikoyat qilmoqda. Shu bilan birga, ularda barcha zaruriy narsalar mavjud emas, taksi xizmatlari qimmatligi sababli ota-onalar kelib kerakli narsalarni olib kela olmaydi”, — deyiladi xabarda.
Ta’kidlanishicha, anomal sovuqqa tayyor emaslik turkman askarlari noroziligiga sabab bo‘lgan birinchi omil emas. Hozirda ko‘plab harbiylar ijaraga olingan xonadonlarda yashamoqda. Ish haqi darajasi esa past. Katta ofitserlar oyiga taxminan 4400—4500 manat (bozor kursida 237 dollar), kichik ofitserlar esa 1900—2000 manat (105 dollar)gacha maosh oladi.
Anomal sovuq Afg‘oniston bilan chegarada xizmat qilayotgan chegarachilarga ta’sir ko‘rsatmoqda. Ayni paytda Afg‘oniston mahalliy matbuoti mamlakatda so‘nggi kunlarda sovuqdan kamida o‘ttiz kishi halok bo‘lganini xabar qilmoqda. Ular orasida bolalar, ayollar, cho‘ponlar, giyohvandlar bor. Kamida sakkiz ming bosh qoramol muzlab nobud bo‘lgan.
Turkman maktab o‘quvchilari anomal sovuqdan aziyat chekmoqda. Mamlakatdagi ko‘plab maktablarda markaziy isitish tizimi yo‘q, o‘qituvchilar o‘z mablag‘lari hisobiga va ota-onalardan yig‘ilgan pul evaziga isitgichlar o‘rnatmoqda. Shu bilan birga, ko‘pchilik ota-onalarning farzandlari uchun issiq kiyim sotib olishga imkoni yo‘q. Askarlarda bo‘lgani kabi, bolalar o‘rtasida ham shamollash ko‘paymoqda.
Bir qator aholi punktlarida, xususan, Lebap viloyatining Farob va Dyanev shaharlarida vodoprovod suvi quvurlarda muzlab qolgan. Odamlar suvni quduqlardan tashiydi. Qishloq joylarda isitish uchun nafaqat gaz, balki an’anaviy go‘ng ham yetarli emas.
Izoh (0)