Rossiya tashqi ishlar vaziri Sergey Lavrov matbuot anjumanida ma’lum qilishicha, Rossiya G‘arbning muzokaralar bo‘yicha har qanday jiddiy takliflarini ko‘rib chiqishga tayyor, biroq hozircha bunday takliflar kelib tushgani yo‘q.
Rossiya tomonining Ukraina prezidenti Vladimir Zelenskiy bilan muzokaralari haqida gap ham bo‘lishi mumkin emas, deya aniqlik kiritdi tashqi ishlar vaziri.
“Zelenskiy bilan muloqot haqida gap ham bo‘lishi mumkin emas, kamida, u Rossiya hukumati bilan muzokaralarni qonuniy jihatdan taqiqlab qo‘ygani sababli”, — dedi vazir.
Mamlakatlar o‘rtasidagi ikki tomonlama muzokaralar may oyida Kiyevning tashabbusi bilan to‘xtatilgan edi. 4-noyabr kuni esa Ukraina prezidenti Vladimir Zelenskiy Vladimir Putin prezidentligi ostidagi Rossiya bilan muzokaralar olib borishni taqiqlovchi farmonni imzoladi. 25-noyabr kuni Ukraina tashqi ishlar vaziri Dmitriy Kuleba Kiyev Moskva bilan muzokaralarga qarshi emasligini, biroq Ukrainaning hududiy yaxlitligi qayta tiklanganidan keyingina buning imkoni bo‘lishini aytdi.
AQSH esa Kiyevga Moskvaga nisbatan “haqiqatga yaqinroq talablar” haqida o‘ylab ko‘rishni maslahat bermoqda. AQSH prezidentining milliy xavfsizlik bo‘yicha maslahatchisi Jeyk Sallivan Ukraina yetakchisi Vladimir Zelenskiyning jamoasiga Moskva bilan muzokaralar uchun “haqiqatga yaqin talablar va birlamchi vazifalar” haqida o‘ylab ko‘rishni, shu jumladan, Kiyevning Qrimni qaytarib olish maqsadini qayta ko‘rib chiqishni tavsiya qilgan.
Avvalroq Ukraina prezidenti Vladimir Zelenskiy o‘zi uchun Rossiya bilan yarashuv muzokaralari imkoniyatini istisno qilmayotganini bildirgandi. U 8-noyabr kuni Rossiya bilan muloqot boshlash uchun Ukrainaning shartlarini ma’lum qilgandi. Ular esa Rossiyaga qo‘shib olingan hududlar qaytarilgan holda Ukraina hududiy yaxlitligining qayta tiklanishi, BMTga hurmat, barcha zararlarning qoplanishi, har bitta harbiy jinoyatchining jazolanishi va bu boshqa hech qachon takrorlanmasligining kafolatlanishidan iborat edi.
Keyinroq Zelenskiyning Rossiya bilan muzokaralar uchun shartlari haqidagi bayonoti AQSHning “yengilgina turtkisi” bilan bog‘liq bo‘lgani haqida xabar berildi.
Noyabr o‘rtalarida Zelenskiy G20 sammitida videomurojaat bilan chiqib, o‘zining o‘nta shartdan iborat bo‘lgan “tinchlik formulasi”ni taklif etgan edi. Ushbu shartlar radiatsiyaviy va yadroviy xavfsizlik; oziq-ovqat xavfsizligi; energetika xavfsizligi; barcha asirlar va deportatsiya qilinganlarning ozod etilishi; BMT ustavining bajarilishi hamda Ukraina hududiy yaxlitligi va dunyo tartibining qayta tiklanishi; Rossiya qo‘shinlarining olib ketilishi va jangovar harakatlarning to‘xtatilishi; adolatning qaytarilishi; ekotsid (flora va faunaning yo‘q qilinishi)ga qarshi kurash; eskalatsiyaga yo‘l qo‘ymaslik; nizo yakunlanganining mustahkamlanishini o‘z ichiga oladi.
Izoh (0)