Niderlandiya Ukrainaga Patriot zenit-raketa komplekslarini (havo hujumidan mudofaa tizimi sifatida foydalaniladi) berish bo‘yicha AQSH va Germaniyaga qo‘shilishga tayyor. Bu haqda Niderlandiya bosh vaziri Mark Ryutte AQSH prezidenti Jo Bayden bilan uchrashuvdan so‘ng ma’lum qildi, deb yozmoqda De Telegraaf.
“Biz Germaniya va AQSHning Ukrainaga Patriot’larni yuborish tashabbusida ishtirok etmoqchimiz”, — deyiladi bosh vazirning bayonotida.
Nashr qayd etishicha, 17-yanvar kuni Ryutte Germaniya kansleri Olaf Shols bilan ham muzokaralar o‘tkazgan. Undan avval bosh vazir Ukraina prezidenti Vladimir Zelenskiy bilan gaplashgandi.
2023-yilda Amsterdam Kiyevni qo‘llab-quvvatlash uchun 2,5 milliard yevro ajratmoqchi, mablag‘ning asosiy qismi maxsus harbiy yordamga mo‘ljallangan, deb yozadi De Telegraaf.
Qo‘shma Shtatlar Ukrainaga Patriot yetkazib berish rejasini 2022-yil dekabrda, Zelenskiyning AQSHga tashrifidan so‘ng e’lon qilgandi. Yanvar oyida Germaniya zenit-komplekslarning ikkinchi batareyasini yubormoqchiligi ma’lum bo‘ldi. Shu bilan birga, ukrainalik harbiylar ushbu qurollardan foydalanish bo‘yicha mashg‘ulotlardan o‘tadi. Ular shu oy Oklaxomadagi AQSH harbiy bazasida boshlanadi va bir necha oy davom etadi.
Izoh (0)