Туркманистон армияси ҳам Марказий Осиёда кузатилаётган аномал совуққа тайёр эмаслиги маълум бўлди, дея хабар берди Turkmen news.
Туркманистонда ҳаво ҳарорати -25 ва ундан паст даражага тушмоқда. Бу кўплаб аҳоли пунктлари учун рекорд даража ҳисобланади.
«Аксарият ҳарбий қисмларда иссиқ душ ҳам йўқ. Аскарлар ота-оналарига оммавий қўнғироқ қилиб, шамоллаш ва гриппга чалинганидан шикоят қилмоқда. Шу билан бирга, уларда барча зарурий нарсалар мавжуд эмас, такси хизматлари қимматлиги сабабли ота-оналар келиб керакли нарсаларни олиб кела олмайди», — дейилади хабарда.
Таъкидланишича, аномал совуққа тайёр эмаслик туркман аскарлари норозилигига сабаб бўлган биринчи омил эмас. Ҳозирда кўплаб ҳарбийлар ижарага олинган хонадонларда яшамоқда. Иш ҳақи даражаси эса паст. Катта офицерлар ойига тахминан 4400—4500 манат (бозор курсида 237 доллар), кичик офицерлар эса 1900—2000 манат (105 доллар)гача маош олади.
Аномал совуқ Афғонистон билан чегарада хизмат қилаётган чегарачиларга таъсир кўрсатмоқда. Айни пайтда Афғонистон маҳаллий матбуоти мамлакатда сўнгги кунларда совуқдан камида ўттиз киши ҳалок бўлганини хабар қилмоқда. Улар орасида болалар, аёллар, чўпонлар, гиёҳвандлар бор. Камида саккиз минг бош қорамол музлаб нобуд бўлган.
Туркман мактаб ўқувчилари аномал совуқдан азият чекмоқда. Мамлакатдаги кўплаб мактабларда марказий иситиш тизими йўқ, ўқитувчилар ўз маблағлари ҳисобига ва ота-оналардан йиғилган пул эвазига иситгичлар ўрнатмоқда. Шу билан бирга, кўпчилик ота-оналарнинг фарзандлари учун иссиқ кийим сотиб олишга имкони йўқ. Аскарларда бўлгани каби, болалар ўртасида ҳам шамоллаш кўпаймоқда.
Бир қатор аҳоли пунктларида, хусусан, Лебап вилоятининг Фароб ва Дянев шаҳарларида водопровод суви қувурларда музлаб қолган. Одамлар сувни қудуқлардан ташийди. Қишлоқ жойларда иситиш учун нафақат газ, балки анъанавий гўнг ҳам етарли эмас.
Изоҳ (0)