Afg‘onistonning Nimroz, Farah, Bodg‘iz viloyatlarida anomal sovuqda to‘rt mingga yaqin qoramol nobud bo‘ldi. Bu haqda Hasht-e Subh Daily xabar berdi.
Nimroz viloyatida anomal sovuq tufayli uch mingdan ortiq chorva mollari, jumladan, sigir, tuya, qo‘y va otlar nobud bo‘lgan. Mazkur holatning aksariyati Xashrud tumanida kuzatilgan. “Tolibon”ning Nimroz viloyatidagi qishloq xo‘jaligi departamenti 2 534 bosh chorva mollari nobud bo‘lganini tasdiqlagan.
Farah viloyatidagi manbalar Balabloq va Fararod tumanlarida mingga yaqin qoramol sovuq oqibatida nobud bo‘lganini aytmoqda. Balabloq tumanidagi bir qancha oilalarning kamida 30-40 qoramoli nobud bo‘lgan. Bodg‘is viloyatida esa to‘rt ming boshdan ortiq chorva mollari anomal sovuq qurboniga aylangan.
Avvalroq Afg‘onistonning Hirot, Bag‘lon va G‘azni viloyatlarida anomal sovuq tufayli 24 nafar giyohvand va bir nafar cho‘pon vafot etgandi. BMTning gumanitar masalalarni muvofiqlashtirish boshqarmasi Afg‘onistonda havo harorati -35 darajagacha sovishi kutilayotganidan ogohlantirgan. Boshqarma oilalarni pul, yoqilg‘i, isitish uskunalari va issiq kiyim bilan ta’minlashni boshlagan.
Izoh (0)