Россия ташқи ишлар вазири Сергей Лавров матбуот анжуманида маълум қилишича, Россия Ғарбнинг музокаралар бўйича ҳар қандай жиддий таклифларини кўриб чиқишга тайёр, бироқ ҳозирча бундай таклифлар келиб тушгани йўқ.
Россия томонининг Украина президенти Владимир Зеленский билан музокаралари ҳақида гап ҳам бўлиши мумкин эмас, дея аниқлик киритди ташқи ишлар вазири.
«Зеленский билан мулоқот ҳақида гап ҳам бўлиши мумкин эмас, камида, у Россия ҳукумати билан музокараларни қонуний жиҳатдан тақиқлаб қўйгани сабабли», — деди вазир.
Мамлакатлар ўртасидаги икки томонлама музокаралар май ойида Киевнинг ташаббуси билан тўхтатилган эди. 4 ноябрь куни эса Украина президенти Владимир Зеленский Владимир Путин президентлиги остидаги Россия билан музокаралар олиб боришни тақиқловчи фармонни имзолади. 25 ноябрь куни Украина ташқи ишлар вазири Дмитрий Кулеба Киев Москва билан музокараларга қарши эмаслигини, бироқ Украинанинг ҳудудий яхлитлиги қайта тикланганидан кейингина бунинг имкони бўлишини айтди.
АҚШ эса Киевга Москвага нисбатан «ҳақиқатга яқинроқ талаблар» ҳақида ўйлаб кўришни маслаҳат бермоқда. АҚШ президентининг миллий хавфсизлик бўйича маслаҳатчиси Жейк Салливан Украина етакчиси Владимир Зеленскийнинг жамоасига Москва билан музокаралар учун «ҳақиқатга яқин талаблар ва бирламчи вазифалар» ҳақида ўйлаб кўришни, шу жумладан, Киевнинг Қримни қайтариб олиш мақсадини қайта кўриб чиқишни тавсия қилган.
Аввалроқ Украина президенти Владимир Зеленский ўзи учун Россия билан ярашув музокаралари имкониятини истисно қилмаётганини билдирганди. У 8 ноябрь куни Россия билан мулоқот бошлаш учун Украинанинг шартларини маълум қилганди. Улар эса Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши, БМТга ҳурмат, барча зарарларнинг қопланиши, ҳар битта ҳарбий жиноятчининг жазоланиши ва бу бошқа ҳеч қачон такрорланмаслигининг кафолатланишидан иборат эди.
Кейинроқ Зеленскийнинг Россия билан музокаралар учун шартлари ҳақидаги баёноти АҚШнинг «енгилгина турткиси» билан боғлиқ бўлгани ҳақида хабар берилди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Изоҳ (0)