Moskvaning Kiyevdan sentabr oyida Rossiya tarkibiga kirgan yangi hududlarni tan olish bo‘yicha muzokaralarni qayta boshlash talabi muvaffaqiyatsizlikka mahkum, dedi AQSH Davlat kotibi Entoni Blinken Buyuk Britaniya tashqi ishlar vaziri Jeyms Kleverli bilan bo‘lib o‘tgan muzokaralar yakuni bo‘yicha matbuot anjumanida. Uning so‘zlari Davlat departamenti saytida keltirilgan.
“Rossiya tomoni ko‘p haftalar va oylardan beri singdirishga urinayotgan shunday ertak bor, go‘yoki ular Ukrainadagi diplomatiyadan manfaatdor, biz esa yo‘q. Bu, albatta, mutlaqo yolg‘on”, — dedi Blinken.
U Turkiya prezidenti Rajab Toyyib Erdo‘g‘on bilan yaqinda bo‘lib o‘tgan suhbatda Rossiya prezidenti Vladimir Putin Ukraina qo‘shib olingan hududlarni Rossiyaniki deb tan olmaguncha, “muzokara qiladigan narsa yo‘q” degan gaplarini esladi.
“Boshqacha qilib aytganda, Ukraina Rossiya bosib olgan hududlar unga qaytarilmasligini tan olmasa va Moskva bilan kelishmasa, hech narsa haqida muzokara olib borilmas ekan. Bu, albatta, o‘zini-o‘zi yo‘q qiladigan g‘oya”, — deya xulosa qildi AQSH Davlat kotibi.
23—27-sentabr kunlari Ukraina tarkibidagi Lugansk va Donetsk xalq respublikalari, Xerson va Zaporojye viloyatlarida Rossiya tarkibiga kirish haqida “referendum” bo‘lib o‘tdi. 30-sentabr kuni Kremlda hududlarning qo‘shilishi to‘g‘risidagi shartnomalarni imzolash marosimi o‘tkazildi. 2-oktabr kuni ular, tartib bo‘yicha, Konstitutsiyaviy sud tomonidan ma’qullandi. 3 va 4-oktabr kunlari shartnomalarni hamda qo‘shilish haqidagi federal konstitutsiyaviy qonunlarni Davlat dumasi va Federatsiya kengashi qo‘llab-quvvatladi. 5-oktabr kuni esa prezident imzosi qo‘yilgan shartnomalarni Kreml e’lon qildi.
BMT bosh kotibi DXR, LXR hamda Xerson va Zaporojye viloyatlarining Rossiya qo‘shinlari nazorati ostidagi qismlari Rossiya tarkibiga kirishi yuridik kuchga ega bo‘lmasligini aytgandi.
13-oktabr kuni esa BMT Bosh assambleyasi Donetsk va Lugansk xalq respublikalarida hamda bosib olingan Xerson va Zaporojye viloyatlarida Rossiya tomonidan o‘tkazilgan “referendumlar”ni qoralovchi rezolyutsiyani qabul qildi.
Izoh (0)