AQSH sobiq davlat kotibi Genri Kissinjer Ukrainaning “neytral” maqomi g‘oyasidan voz kechdi. Uning so‘zlariga ko‘ra, urush boshlanganidan keyin Ukraina NATO tarkibiga kirish huquqini qo‘lga kiritgan. Bu haqda u Davosdagi forumda so‘zlagan nutqida gapirdi.
“Urushdan oldin men Ukrainaning NATOga a’zo bo‘lishiga qarshi edim, chunki hozir biz guvoh bo‘layotgan hodisalarning boshlanishidan qo‘rqardim. Hozir bu jarayon shunday darajaga yetgani sababli, ushbu sharoitda neytral Ukraina g‘oyasi endi mantiqiy emas. Oxir-oqibat, u NATOdan qanday shaklda bo‘lsa ham kafolatlar olishi kerak. Endi Ukrainaning NATOga kirishi maqbul yo‘l”, — dedi u.
Bir oy oldin Kissinjer The Spectator jurnali uchun maqola yozib, Ukrainadagi urushni “tinch yo‘l bilan hal qilishni” taklif qilgan edi. U o‘zining bir nechta variantini taqdim etdi: masalan, xalqaro nazorat ostida Rossiya tomonidan bosib olingan hududlarda referendumlar o‘tkazish yoki Ukrainaning 24-fevralgacha bo‘lgan chegaralariga qaytishi kabi.
“Kissinjerning iste’dodi, tajribasi va tahliliga har doim talab bor, ayniqsa, bunday keskin vaziyatlarda. Biz ushbu materialni katta qiziqish bilan o‘rganamiz. Hozircha, afsuski, bunday imkoniyat yo‘q”, — degan Rossiya prezidentining matbuot kotibi Dmitriy Peskov o‘shanda.
Kissinjer 1973—1977-yillarda AQSH Davlat kotibi lavozimida ishlagan. 1973-yilda u Vyetnamdagi urushni vaqtincha to‘xtatgan Parij tinchlik kelishuviga erishishdagi roli uchun Nobel mukofotiga sazovor bo‘lgan.
Izoh (0)