Rossiyaning “Sistema PBO” kompaniyasi Qozog‘istonda “Vkusno — i tochka” savdo belgisini ro‘yxatdan o‘tkazish uchun ariza topshirdi. Bu haqda “Interfaks-Qozog‘iston” xabar bermoqda.
Murojaat ekspert tashkiloti tomonidan ko‘rib chiqilmoqda, deya xabar beradi agentlikka Qozog‘iston Adliya vazirligining intellektual mulk huquqlari bo‘yicha boshqarmasi.
“Vkusno — i tochka” Rossiyada McDonald’s restoranlari o‘rnini egallagan. Amerika franshizasi Ukrainada urush boshlanganidan keyin Rossiyadagi 26 yillik faoliyatini to‘xtatdi.
2022-yil 19-maydan beri tadbirkor Aleksandr Govor Rossiyadagi 850 ta McDonald’s restoranining egasiga aylandi. 12-iyun kuni u yangi brend ostida tarmoqni qayta ishga tushirdi.
McDonald’s 2016-yilda Qozog‘istonda ochilgan. Hammasi bo‘lib mamlakat hududida 24 ta McDonald’s restorani faoliyat yuritgan: Olmaota, Ostona, Atirau, Aqto‘be, Qo‘stanay va Qarag‘anda.
Qozog‘istondagi McDonald’s restoranlari 2022-yil 18-noyabrda yopilgandi. Tarmoqning to‘xtatilishi haqidagi rasmiy e’lon 2023-yil 5-yanvarda paydo bo‘ldi.
Yopilish sababi Food Solutions franshisazi rahbariyati tomonidan mahalliy yetkazib berishdagi cheklovlar edi.
Qozog‘iston Savdo va integratsiya vaziri Serik Jumangarinning so‘zlariga ko‘ra, Qozog‘iston hukumati tarmoqni har tomonlama qo‘llab-quvvatlashga tayyor edi, “lekin kompaniyaning o‘zi buni istamadi, chunki obro‘-e’tibor xavflari bor”.
Avvalroq Rossiyaning “Vkusno — i tochka” restoranlar tarmog‘i O‘zbekistonda o‘z savdo belgilarini ro‘yxatdan o‘tkazgani haqida xabar berilgan edi.
Izoh (0)