“Mazali va nuqta”: Rossiyaning “Vkusno — i tochka” restoranlar tarmog‘i O‘zbekistonda o‘z savdo belgilarini ro‘yxatdan o‘tkazdi

Rossiyada “Vkusno — i tochka” tarmog‘iga egalik qiluvchi “Sistema PBO” MCHJ O‘zbekistonda ikkita savdo belgisini ro‘yxatdan o‘tkazish uchun ariza berdi, deb yozadi “Kommersant”.

O‘zbekiston Adliya vazirligi ma’lumotlar bazasida ariza 28-dekabr kuni paydo bo‘lgan. Kompaniya ikkita — “Mazali va nuqta” va “Lazzatli va nuqta” savdo belgilarini ro‘yxatdan o‘tkazmoqchi bo‘lgan, ularning ikkalasi ham “Vkusno — i tochka” deb tarjima qilinadi.

Spot yozishicha, tegishli yozuvlar Intellektual mulk departamenti ma’lumotlar bazasida 28-dekabr kuni 20227184 va 20227186 raqamlari ostida ro‘yxatdan o‘tkazilgan. Kompaniya bir vaqtning o‘zida barcha toifalar bo‘yicha arizalarni topshirgan.

McDonald’s tarmog‘i may oyida Rossiya bozorini tark etishini e’lon qilgandi. Kompaniya aktivlarini tadbirkor Aleksandr Govor sotib oldi, u Sibirda 25 ta McDonald’s restoranlarini boshqarib kelgan. Tarmoq Rossiyada “Vkusno — i tochka” deb qayta nomlandi, uning ilk restoranlari 12-iyun kuni ochildi.

Avvalroq Rossiyaning “Vkusno — i tochka” restoranlar tarmog‘i o‘z brendini O‘zbekiston, MDH mamlakatlari, shuningdek, McDonald’s mavjud bo‘lmagan boshqa xorijiy mamlakatlar bozoriga chiqarish imkoniyatini ko‘rib chiqayotgani xabar berilgan edi.