Bloomberg Shveysariyaning LuxeConsult tahliliy firmasi prognoziga tayanib, 2033-yilga borib vintaj va eskirgan qimmatbaho soatlar sotuvi 79 milliard yevroga (85 milliard dollar) yetadi, deb xabar berdi.
Shu bilan birga, dunyoda yangi hashamatli soatlar savdosining o‘sish sur’ati ancha past bo‘ladi. Natijada o‘n yildan so‘ng ikkilamchi bozor sotish hajmi bo‘yicha birlamchi bozorni ortda qoldiradi.
LuxeConsult hisob-kitoblariga ko‘ra, o‘tgan yili lyuks soatlarning ikkilamchi bozori 25 milliard yevroni tashkil etgan.
Kompaniya tahlilchilarining fikricha, eskirgan Rolex, Patek Philippe yoki Audemars Piguyet soatlariga bo‘lgan talabning o‘sishi ishlab chiqaruvchilarning ishlab chiqarish quvvati cheklanganligi sababli o‘z mahsulotlariga bo‘lgan talabni qondirishga ulgurmasligi bilan bog‘liq.
“Qimmatbaho soatlarni yaxshi ko‘radiganlar esa orzu qilingan brend modellarini sotib olish imkoniyatini uzoq kutishni istamay, ikkilamchi bozorga yo‘l oladi”, — deyiladi xabarda.
Avvalroq Deloitte lyuks soatlar ikkilamchi bozorini rivojlantirish bo‘yicha o‘zining oddiyroq prognozini taqdim etgan edi. Uning hisob-kitoblariga ko‘ra, bu bozor 2030-yilga borib 30 milliard dollargacha o‘sadi.
Izoh (0)