Yevroittifoq va G7 davlatlari Rossiyadan energiya narxini cheklab qo‘yganidan keyin Xitoyning kamida to‘rtta supertankeri Rossiyaning Urals neftini Xitoyga yetkazib bermoqda. Bu haqda Reuters xabar bermoqda.
Agentlik ma’lumotlariga ko‘ra, yana bir kema Hindistonga yo‘l olgan. Manbalarga ko‘ra, barcha beshta yetkazib berish 22-dekabrdan yanvargacha bo‘lgan davrga mo‘ljallangan edi.
G‘arb sanksiyalariga qaramay, Xitoy va Hindiston Rossiya neftini chegirma bilan sotib olishda davom etmoqda, deb yozadi agentlik.
Dekabr oyida kuchga kirgan narx chegaralari Yevropa Ittifoqiga a’zo bo‘lmagan mamlakatlarga Rossiyadan neft import qilish imkonini beradi, lekin sug‘urta, kemalar va Rossiya neftini dengiz orqali tashish bo‘yicha har qanday xizmatlarni, agar sotish bo‘yicha shartnomalarda barrel uchun 60 dollarlik narx belgilanmagan bo‘lsa, taqiqlaydi.
“Urals neftining narxi narx chegarasidan ancha past ekanini hisobga olsak, uning savdosi mohiyatan qonuniydir”, — deydi ta’minot bilan shug‘ullanadigan xitoylik firma rahbarlaridan biri. Agentlik uning ismini oshkor qilmagan.
Reuters xabariga ko‘ra, Rossiya Hindistonga neftni 12—15 dollar chegirma bilan sotadi. Bloomberg aniqlik kiritishicha, 6-yanvar kuni Urals nefti bir barreli uchun 37,8 dollardan sotilgan, o‘sha kuni Brent bir barrel uchun 78,57 dollardan sotilgan.
Rossiya nefti narxining yuqori chegarasi o‘tgan yilning 5-dekabridan kuchga kirdi. Cheklovlar Yevropa Ittifoqi mamlakatlari, G7, Avstraliya va Norvegiya tomonidan kelishilgan.
O‘z navbatida, Rossiya hukumati narxlar chegarasiga rioya qilishni talab qiladigan mamlakatlarga neft va neft mahsulotlarini yetkazib berishni taqiqlagan.
Izoh (0)