Yevropa komissiyasi 2022-yilning uchinchi choragi uchun gaz bozori holati to‘g‘risidagi hisobotni e’lon qildi.
Materiallarga ko‘ra, iyuldan sentabrgacha Yevropa Ittifoqi gaz importiga 101 milliard yevroga yaqin mablag‘ sarflagan, bu so‘nggi o‘n yillikdagi rekord ko‘rsatkichdir. 2021-yilning xuddi shu davridagi xarajatlar 29 milliard yevroni tashkil etgandi.
Hisobotda qayd etilishicha, uchinchi chorakda Rossiya gaz quvurlari importi 2021-yilning shu davriga nisbatan 74 foizga kamaygan.
Belarus orqali yetkazib berishning qisqarishi 96 foizni, Ukraina orqali — 63 foizni, “Shimoliy oqim 1” orqali — 85 foizni tashkil etgan. “Turk oqimi” orqali gaz yetkazib berish hajmi 21 foizga oshgan.
Rossiyadan yetkazib berish keskin kamayib ketganiga qaramay, uchinchi chorakda Yevropa Ittifoqiga suyultirilgan gaz (SNG) importi 89 foizga oshdi va 32 milliard kub metrni tashkil etdi.
AQSHdan LNG importi hisobiga yetkazib berish hajmini saqlab qolish mumkin edi. O‘tgan yilning yanvaridan noyabrigacha AQSHdan Yevropa Ittifoqiga LNG yetkazib berish 52 milliard kub metrni tashkil qilgan.
YIda gaz iste’moli uchinchi chorakda o‘tgan yilning shu davriga nisbatan 8 foizga (-5,1 milliard kub metr) kamayib, 59 milliard kub metrni tashkil etdi.
Shu bilan birga, hisobotda qayd etilishicha, gaz narxining oshishi sanoatning ayrim tarmoqlarida talabning amalda pasayishiga olib keldi.
Uchinchi chorakda Yevropa Ittifoqining jami gaz importi 2 foizga oshdi, ishlab chiqarish esa 9 foizga kamaydi.
Sentabr oyida Yevropa Ittifoqidagi gaz omborlarini o‘rtacha to‘ldirish darajasi 89 foizga yetgan, bu 2021-yilga nisbatan qariyb 14 foizga yuqori.
Yevropada yanvar oyining g‘ayritabiiy issiq boshlanishi fonida qit’ada gaz narxi TTF indeksi bo‘yicha eng yaqin fyucherslarda 1 MVt/soat uchun 69 yevroga tushib ketdi. Bu o‘tgan yildagi eng past ko‘rsatkich va 2022-yil avgust oyidagi eng yuqori gaz narxidan besh baravar past.
Izoh (0)