Россиянинг «Sistema PBO» компанияси Қозоғистонда «Вкусно — и точка» савдо белгисини рўйхатдан ўтказиш учун ариза топширди. Бу ҳақда «Интерфакс-Қозоғистон» хабар бермоқда.
Мурожаат эксперт ташкилоти томонидан кўриб чиқилмоқда, дея хабар беради агентликка Қозоғистон Адлия вазирлигининг интеллектуал мулк ҳуқуқлари бўйича бошқармаси.
«Вкусно — и точка» Россияда McDonald’s ресторанлари ўрнини эгаллаган. Америка франшизаси Украинада уруш бошланганидан кейин Россиядаги 26 йиллик фаолиятини тўхтатди.
2022 йил 19 майдан бери тадбиркор Александр Говор Россиядаги 850 та McDonald’s ресторанининг эгасига айланди. 12 июнь куни у янги бренд остида тармоқни қайта ишга туширди.
McDonald’s 2016 йилда Қозоғистонда очилган. Ҳаммаси бўлиб мамлакат ҳудудида 24 та McDonald’s ресторани фаолият юритган: Олмаота, Остона, Атирау, Ақтўбе, Қўстанай ва Қарағанда.
Қозоғистондаги McDonald’s ресторанлари 2022 йил 18 ноябрда ёпилганди. Тармоқнинг тўхтатилиши ҳақидаги расмий эълон 2023 йил 5 январда пайдо бўлди.
Ёпилиш сабаби Food Solutions франшисази раҳбарияти томонидан маҳаллий етказиб беришдаги чекловлар эди.
Қозоғистон Савдо ва интеграция вазири Серик Жумангариннинг сўзларига кўра, Қозоғистон ҳукумати тармоқни ҳар томонлама қўллаб-қувватлашга тайёр эди, «лекин компаниянинг ўзи буни истамади, чунки обрў-эътибор хавфлари бор».
Аввалроқ Россиянинг «Вкусно — и точка» ресторанлар тармоғи Ўзбекистонда ўз савдо белгиларини рўйхатдан ўтказгани ҳақида хабар берилган эди.
Изоҳ (0)