Turkiya prezidenti Rajab Toyyib Erdo‘g‘on Shvetsiyadan NATOga a’zolik arizasini tasdiqlash uchun 130 nafar “terrorchi”ni ekstraditsiya qilishni talab qildi. Bu haqda Anadolu xabar berdi.
Erdo‘g‘on Stokgolm 130 nafar “terrorchi”ni Anqaraga ekstraditsiya qilgandan keyingina Turkiya Shvetsiyaning NATOga kirishini ma’qullashini aytdi. U Shvetsiya Turkiya terrorchi tashkilot deb hisoblagan Kurdiston ishchilar partiyasini qo‘llab-quvvatlovchi namoyishlarga hech qanday tarzda aralashmasligini aytdi. Stokgolm avvalroq berishni va’da qilgan 130 nafar kurdni Anqaraga ekstraditsiya qilmagan.
“Biz ularga aytdik: Agar siz mamlakatingizdagi terrorchilarni ekstraditsiya qilmasangiz, NATO a’zoligi haqidagi arizangizni parlamentimizda ratifikatsiya qila olmaymiz. Ularning takliflari parlamentimizdan o‘tishi uchun 130 ga yaqin terrorchini ekstraditsiya qilishlari kerak, afsuski, ular buni hali amalga oshirmagan”, — dedi Erdo‘g‘on.
Turkiya prezidenti Shvetsiyada Kurdiston ishchilar partiyasi tarafdorlari tomonidan muntazam ravishda Stokgolm ko‘chalarida norozilik namoyishlari o‘tkazilishini aytdi. U Shvetsiya hukumatini bunga yo‘l qo‘yib bo‘lmasligi haqida bir necha bor ogohlantirganini bildirdi.
Eslatib o‘tamiz, 13-yanvar kuni Shvetsiyaning Stokgolm meriyasi oldida kurd faollari tomonidan Turkiya prezidenti Rajab Toyyib Erdo‘g‘onga o‘xshash qo‘g‘irchoq teskari osilib ketildi. Holat yuzasidan Anqara Shvetsiyani terrorizmga qarshi kurashish va o‘z hududida Turkiyaga qarshi harakatlarning oldini olish bo‘yicha o‘z majburiyatlarini buzganlikda aybladi.
“Osilgan qo‘g‘irchoq” sababli Shvetsiyaning Anqaradagi elchisi Staffan Xyorstryom Turkiya Tashqi ishlar vazirligiga chaqirtirildi. Suhbat davomida voqea yuzasidan keskin norozilik bildirilib, nota topshirildi. Turkiya Shvetsiya parlamenti spikerining mamlakatga rejalashtirilgan tashrifini bekor qildi. Turkiya prezidenti Rajab Toyyib Erdo‘g‘onning advokatlari Stokgolmdagi provokatsiya yuzasidan Anqara Respublika sudiga murojaat qildi.
Mavzuga doir:
Izoh (0)