Shvetsiyaning Stokgolm meriyasi oldida kurd faollari tomonidan Turkiya prezidenti Rajab Toyyib Erdo‘g‘onga o‘xshash qo‘g‘irchoq teskari osilib ketildi. Bu haqda Reuters xabar berdi.
Holat yuzasidan Anqara Shvetsiyani terrorizmga qarshi kurashish va o‘z hududida Turkiyaga qarshi harakatlarni oldini olish bo‘yicha o‘z majburiyatlarini buzganlikda aybladi. “Osilgan qo‘g‘irchoq” Rojava qo‘mitalari (Suriyaning Rojava shahri nomi bilan atalgan) “butun Kurdiston bo‘ylab inqilobiy harakat bilan birdamlik va hamkorlik tarmog‘i” tomonidan amalga oshirilgan. Turkiya matbuoti ularni Kurdiston ishchilar partiyasi tarafdorlari deb e’lon qilgan.
Tashkilot Erdo‘g‘onning “osilgani” aks etgan videoni o‘zining Twitter’dagi sahifasiga quyidagi matn bilan birga yuklagan:
“Tarix diktatorlar qanchalik tez-tez tugashini ko‘rsatadi, shu uchun hammaning manfaati inobatga olib, Taqsim maydonida teskari ‘osilmaslik’ uchun, Erdo‘g‘on, iste’foga chiqing!”, — deyiladi video izohida.
“Osilgan qo‘g‘irchoq” Turkiyaning g‘azabini qo‘zg‘atish va Shvetsiyani NATOga qo‘shilishdan to‘xtatish uchun qilingan provokatsiya bo‘lishi mumkin. Videoga ilova qilingan matnda Rojava qo‘mitalari “Biz NATOga yo‘q deymiz! Fashistlar bilan ittifoq bo‘lmaydi!" deb yozadi.
Erdo‘g‘onning matbuot kotibi Fahrettin Altun Turkiya prezidenti haqoratlanishiga munosabat bildirgan.
“Bu Shvetsiya rasmiylari so‘nggi paytlarda da‘vo qilganidek terrorizmga qarshi kerakli choralarni ko‘rmaganining isboti”, — degan u va Shvetsiya NATOga a’zo bo‘lish uchun o‘z va’dalarini bajarishi kerakligini bildirgan.
“Osilgan qo‘g‘irchoq” sababli Shvetsiyaning Anqaradagi elchisi Staffan Xyorstryom Turkiya Tashqi ishlar vazirligiga chaqirtirilgan. Suhbat davomida voqea yuzasidan keskin norozilik bildirilib, nota topshirilgan. Turkiya Shvetsiya parlamenti spikerining mamlakatga rejalashtirilgan tashrifini bekor qilgan. Turkiya prezidenti Rajab Toyyib Erdo‘g‘onning advokatlari Stokgolmdagi provokatsiya yuzasidan Anqara Respublika sudiga murojaat qilgan.
Izoh (0)