Yaponiya va Hindiston Harbiy-havo kuchlari birinchi qo‘shma mashg‘ulotlarni boshladi, ular 26-yanvarga qadar davom etadi. Bu haqda Kyodo agentligi Yaponiya mudofaa vazirligiga tayanib xabar berdi.
Qayd etilishicha, manyovrlar Tokio yaqinidagi Xyakuri Harbiy-havo kuchlari bazasida o‘tkazilmoqda.
Shartli havo janglarini ishlab chiqish uchun Yaponiya tomoni to‘rtta F-2 qiruvchi-bombardimonchi va to‘rtta F-15 qiruvchi samolyotini, Hindiston tomoni esa to‘rtta Su-30MKI qiruvchilarini jalb qilgan. Bundan tashqari, Hindiston mashqlarga ikkita C-17 tashuvchi samolyoti va Il-78 yonilg‘i quyuvchi samolyotini yuborgan.
Kyodo ikki mamlakat harbiy tadbirlarni 2019-yilning noyabr oyida o‘tkazishga kelishib olgani, ammo COVID-19 pandemiyasi tufayli ularni keyinga surganini eslatdi.
Hindiston Yaponiya bilan ikki tomonlama havo mashqlarini o‘tkazayotgan beshinchi davlatga aylandi — Tokio bunday mashqlarni AQSH, Avstraliya, Buyuk Britaniya va Germaniya bilan olib borayotgandi.
Bunga qadar Yaponiya quruqlik va dengiz kuchlari hindistonlik hamkasblari bilan qo‘shma mashg‘ulotlar o‘tkazgan.
Eslatib o‘tamiz, Hindiston va Yaponiya AQSH va Avstraliya bilan birgalikda Xavfsizlik bo‘yicha to‘rt tomonlama dialogning (QUAD) bir qismi. Pekin mintaqada harbiy va iqtisodiy ta’sirini oshirishga intilayotgani sababli ushbu guruh Xitoyga qarshi deb ko‘riladi.
Izoh (0)