Kreml Britaniyaning Challenger 2 tanklari Ukrainaga yetkazib berilishini “juda salbiy” baholaydi va salbiy qabul qiladi, dedi Rossiya prezidenti matbuot kotibi Dmitriy Peskov.
“Biz buni juda salbiy qabul qilamiz. Bu borada munosabatimizni yashirib o‘tirmaymiz. Buyuk Britaniya, boshqa Yevropa davlatlari — Polsha va hokazolar Ukraina uchun yangi, texnologik jihatdan ilg‘or harbiy texnikalarni yetkazib berishning yangi bosqichini tashkil etish rejasi haqida gapirmoqda, ammo bu joydagi vaziyatni o‘zgartira olmaydi. Ular buni tushunishi kerak”, — deydi Kreml matbuot kotibi.
Uning ta’kidlashicha, bu Rossiya “harbiy operatsiyasi” jarayoniga ta’sir qilmaydi.
“Bu hech narsani o‘zgartira olmaydi. Maxsus harbiy operatsiya davom etadi. Xuddi qolganlaridek bu tanklar yonmoqda va yonishda davom etadi. Maxsus harbiy operatsiyaning maqsadlariga erishiladi”, — dedi Peskov.
O‘tgan hafta Buyuk Britaniya Kiyevga Challenger 2 og‘ir tanklarining birinchi partiyasini jo‘natishi haqida e’lon qildi. Bugun, 16-yanvar kuni Polsha bosh vaziri Mateush Moravetskiy Germaniya bilan Ukrainaga Leopard tanklarini yetkazib berish masalasini muhokama qilishini aytdi. Ukraina tashqi ishlar vaziri o‘rinbosari Andrey Melnik Germaniyadan eski Tornado samolyotlarini ham so‘radi.
Izoh (0)