Туркия президенти Ражаб Тоййиб Эрдўғон Швециядан НАТОга аъзолик аризасини тасдиқлаш учун 130 нафар «террорчи»ни экстрадиция қилишни талаб қилди. Бу ҳақда Anadolu хабар берди.
Эрдўғон Стокгольм 130 нафар «террорчи»ни Анқарага экстрадиция қилгандан кейингина Туркия Швециянинг НАТОга киришини маъқуллашини айтди. У Швеция Туркия террорчи ташкилот деб ҳисоблаган Курдистон ишчилар партиясини қўллаб-қувватловчи намойишларга ҳеч қандай тарзда аралашмаслигини айтди. Стокгольм аввалроқ беришни ваъда қилган 130 нафар курдни Анқарага экстрадиция қилмаган.
«Биз уларга айтдик: Агар сиз мамлакатингиздаги террорчиларни экстрадиция қилмасангиз, НАТО аъзолиги ҳақидаги аризангизни парламентимизда ратификация қила олмаймиз. Уларнинг таклифлари парламентимиздан ўтиши учун 130 га яқин террорчини экстрадиция қилишлари керак, афсуски, улар буни ҳали амалга оширмаган», — деди Эрдўғон.
Туркия президенти Швецияда Курдистон ишчилар партияси тарафдорлари томонидан мунтазам равишда Стокгольм кўчаларида норозилик намойишлари ўтказилишини айтди. У Швеция ҳукуматини бунга йўл қўйиб бўлмаслиги ҳақида бир неча бор огоҳлантирганини билдирди.
Эслатиб ўтамиз, 13 январь куни Швециянинг Стокгольм мерияси олдида курд фаоллари томонидан Туркия президенти Ражаб Тоййиб Эрдўғонга ўхшаш қўғирчоқ тескари осилиб кетилди. Ҳолат юзасидан Анқара Швецияни терроризмга қарши курашиш ва ўз ҳудудида Туркияга қарши ҳаракатларнинг олдини олиш бўйича ўз мажбуриятларини бузганликда айблади.
«Осилган қўғирчоқ» сабабли Швециянинг Анқарадаги элчиси Стаффан Хёрстрём Туркия Ташқи ишлар вазирлигига чақиртирилди. Суҳбат давомида воқеа юзасидан кескин норозилик билдирилиб, нота топширилди. Туркия Швеция парламенти спикерининг мамлакатга режалаштирилган ташрифини бекор қилди. Туркия президенти Ражаб Тоййиб Эрдўғоннинг адвокатлари Стокгольмдаги провокация юзасидан Анқара Республика судига мурожаат қилди.
Мавзуга доир:
Изоҳ (0)