Italiya politsiyasi Matteo Messina Denaroni qo‘lga oldi, u Sitsiliyaning “Koza nostra” jinoiy guruhi yetakchilaridan biri hisoblanadi. Bu haqda ANSA agentligi o‘z manbalariga tayanib xabar bermoqda.
Mafiya bossi Sitsiliya viloyatining Palermo shahridagi xususiy klinikada davolanayotgan paytida qo‘lga olingan. Uni qo‘lga tushirish bo‘yicha maxsus operatsiyani mahalliy prokuror muvofiqlashtirgan.
Matteo Messina Denaro 1993-yildan buyon qidiruvda bo‘lgan va Italiyaning eng ko‘p qidirilayotgan mafiozilaridan biri bo‘lgan. U o‘nlab qotilliklar uchun sirtdan umrbod qamoq jazosiga hukm qilingan. U, shu jumladan, 1992-yilda italiyalik tergovchilar va mafiyaga qarshi kurashuvchilar Jovanni Falkone va Paolo Borsellinoni o‘ldirishda qatnashganlikda ham ayblanmoqda. Shuningdek, u 1993-yilda Milan, Florensiya va Rimdagi portlashlarga ham aloqador deb hisoblaniladi.
2006-yilda Sitsiliya mafiyasi yetakchisi Bernardo Provensano hibsga olingach, Messina Denaro “Koza nostra” yetakchilaridan biriga aylangan. U qidiruv davom ettirilgan “birinchi kattalikdagi” so‘nggi mafiozi bossi bo‘lib qolgandi, deb yozadi ANSA.
Agentlik qayd etishicha, Messina Denaro 38 yil davomida adolatdan qochib yurgan Bernardo Provensanodan bir necha yilga kamroq vaqt mobaynida qidiruvda bo‘lib kelgan. Sitsiliya mafiyasining yana bir bossi Salvatore Toto Riina esa 23 yil davomida qidiruvda bo‘lgandi.
Mavzuga doir:
- Sitsiliyaning Kataniya shahrida cho‘qintirgan otalar vaqtinchalik taqiqlandi. Bu qisman mafiya bilan bog‘liq
- Koronavirus Italiya mafiyasining quroliga aylanmoqda. Pandemiya davridagi Lotin Amerikasi muammolari va Xitoyning ishonchsiz statistikasi
- Sitsiliya mafiyasining “bosslar bossi” 87 yoshida vafot etdi
Izoh (0)