Ukraina prezidenti Vladimir Zelenskiy Rossiyaning Dneprdagi ko‘p qavatli uyga raketa bilan zarbalari fonida 15-yanvar kuni kechki murojaatida rossiyaliklarga rus tilida murojaat qildi, deb yozadi DW.
“Hamma narsani yaxshilab ko‘rib, bilib turib, bu terrorni qoralab lom-mim demagan rossiyaliklarga qarata gapirmoqchiman. Sizning qo‘rqoqlarcha jimjitlik saqlashingiz, bo‘layotgan voqealarning o‘tishini poylab turishga urinishingiz oqibatida bu terrorchilar bir kun kelib sizning ham izingizdan tushadi. Yovuzlik qo‘rqoqlikni juda yaxshi sezadi va o‘zidan qo‘rqib, savdolashishga urinayotganlarni doim eslab qoladi. U sizning ortingizdan kelganida esa, sizni himoya qiladigan hech kim bo‘lmaydi”, — dedi Ukraina rahbari.
Dneprdagi uyga zarba berilishi oqibatida 30 kishi halok bo‘ldi, dedi Ukraina prezidenti. Ulardan biri 15 yoshli qizcha bo‘lgan. Ikki nafar bola esa ota-onasiz qolgan.
Zelenskiyning aytishicha, raketa kelib tushganida uyda bo‘lgan deb taxmin qilinayotgan 30 kishining taqdiri noma’lum bo‘lib turibdi. “O‘nlab odamlarni vayronalar ostidan chiqarib olishga muvaffaq bo‘ldik, ularning olti nafari bolalar. Biz har bir kishi uchun kurashyapmiz! Kimningdir hayotini saqlab qolish uchun eng kichik imkoniyat mavjud bo‘lib turar ekan, qutqaruv operatsiyasi davom etaveradi”, — deya ta’kidladi u.
Rossiyaning Ukrainaga 14-yanvar kungi ommaviy hujumi vaqtida Dnepr shahridagi to‘qqiz qavatli turar joy binosiga raketa kelib tushdi. Raketa hujumi oqibatida 72 xonadon vayron bo‘lgan, 230 dan ortig‘i zarar ko‘rgan.
14-yanvar kuni tushdan keyin Rossiya Ukrainaga qarshi navbatdagi ommaviy zarbalarni berdi. Dneprda to‘qqiz qavatli binoga raketa urilishi oqibatda ikkinchi qavatdan to‘qqizinchi qavatgacha bo‘lgan ikkita podyezd vayron bo‘lgan.
Izoh (0)