Odamlar Oyda yashay oladimi? Amerikalik astrofizik buning ehtimolini baholadi

AQSHning Jon Xopkins universiteti astrofizigi Jozef Silk odamlar Oyda yashay olishi ehtimoli haqida gapirdi. Bu haqda Nautilus xabar berdi.

Mutaxassisning so‘zlariga ko‘ra, yigirma yildan keyin Oy istiqbolli joyga aylanadi va tadqiqotlar jadallashadi. Bu boshqa sayyoralarni o‘rganish uchun boshlang‘ich nuqta bo’ladi.

“Nega odamlar yashay olmas ekan? Agar kun kelib Yerni tark etishga qaror qilsak, muqobil yashash joy qidirish kerak bo‘ladi. Bunga yagona real variant tadqiqotchilar, ishbilarmonlar va olimlar birinchi bo‘lib ketadigan Oydir. Chunki tortishish kuchi pastligi sababli Oy muhiti kosmik kemalarni jo‘natish nuqtayi nazaridan ancha qulaydir”, — deydi Silk.

Olimning ta’kidlashicha, agar pul ishlab topish uchun qiziqish bo‘lsa, Oyda qazib olish sohasi yaxshi yechim bo‘la oladi. Bu Yerdagi zaxiralarni to‘ldirishga yordam beradi. Bundan tashqari, Oy atrofida sayohat qilish uchun chiptalar qimmat bo‘lsa ham, ular allaqachon mavjud.

“Kosmik turizm mavjudligini unutmaslik kerak. Parvoz uchun chiptalar qimmat bo‘lsa ham, sotilmoqda. Ilon Mask kabi odamlar buni yaqin besh yil ichida amalga oshiradi. Bundan tashqari, hamma biladiki, chuqur va qorong‘i Oy kraterlari tubida juda ko‘p miqdorda suv muzlari mavjud. Bu bizga nafaqat hayot uchun asosiy manba, balki kislorod va vodorodni ham ta’minlab beradi. Ularni Quyosh energiyasi yordamida eritish bizga quyosh tizimi bo‘ylab sayohat qilish uchun raketa yonilg‘isini beradi”, — deydi astrofizik.

Nautilus nashri muallifini Oy teleskoplar qurish joyi sifatida o‘ziga tortadi. Tabiiy yo‘ldosh yuzasidan yulduzlarni iloji boricha aniq ko‘rish mumkin. Shuningdek, Oydan koinotga butunlay boshqacha qarash mumkin bo‘ladi, chunki Yer ionosferasi kosmosda past chastotali radioto‘lqinlarni qabul qilishni qiyinlashtiradi.

“Bu olti metrli James Webb teleskopidan ham kattaroq teleskop yaratishga imkon beradi. Uning diametri bir necha kilometrni tashkil qiladi. Oyda ishlaydigan odamlar avval biosferani qanday yaratishni tushunishi kerak. Variant sifatida uni qandaydir sun’iy tuzilma ichiga joylashtirish mumkin, ammo o‘lchamlari cheklangan bo‘ladi. Kelgusi o‘n yilliklarda haqiqatan ham amalga oshirilishi mumkin bo‘lgan ulkan lava naychasidan foydalanish varianti yanada istiqbolli hisoblanadi”, — deyiladi maqolada.

Mavzuga doir: Odamlar yaqin 10 yil ichida Oyda yashaydigan bo‘ladi — NASA