Rossiyaning Ukrainaga 14-yanvar kungi ommaviy hujumi vaqtida Dnepr shahridagi to‘qqiz qavatli turar joy binosiga raketa kelib tushdi. Oqibatda, so‘nggi ma’lumotlarga ko‘ra, 20 kishi halok bo‘ldi. Bu haqda Dnepropetrovsk viloyati ma’muriyati rahbari Valentin Reznichenko ma’lum qildi.
Yana 73 kishi, jumladan, 14 bola jarohatlangan, deydi Dnepropetrovsk viloyat kengashi rahbari Nikolay Lukashuk. 40 dan ortiq kishi kasalxonaga yotqizilgan, to‘rt nafari og‘ir reanimatsiyada.
“Qutqaruv operatsiyasi davom etmoqda. 40 dan ortiq odamning taqdiri noma’lumligicha qolmoqda”, — deb yozdi Reznichenko Telegram’da.
Dneprdagi turar joy binosiga raketa hujumi oqibatida 72 xonadon vayron bo‘lgan, 230 dan ortig‘i zarar ko‘rgan. Viloyat hokimligi rahbarining so‘zlariga ko‘ra, o‘t o‘chiruvchilar bir nechta yong‘inlarni o‘chirishda davom etmoqda.
14-yanvar kuni tushdan keyin Rossiya Ukrainaga qarshi navbatdagi ommaviy zarbalarni berdi. Dneprda to‘qqiz qavatli binoga raketa urilishi oqibatda ikkinchi qavatdan to‘qqizinchi qavatgacha bo‘lgan ikkita podyezd vayron bo‘lgan.
Izoh (0)