Suriya tashqi ishlar vaziri Faysal Mekdad Turkiya qo‘shinlari Suriyadan olib chiqilmaguncha Anqara bilan diplomatik yaqinlashishning iloji yo‘qligini ma’lum qildi. Bu haqda u eronlik hamkasbi Amir Abdullaxon bilan uchrashuvdan so‘ng aytdi, deb xabar beradi Reuters.
“Biz okkupatsiyani olib tashlamasdan turib, Turkiya bilan normal munosabatlarni tiklash haqida gapira olmaymiz”, — dedi diplomat. Bundan tashqari, Suriya muxolif guruhlarni qo‘llab-quvvatlashni to‘xtatishni talab qilmoqda, deb yozadi agentlik.
Mekdod Suriya prezidenti Bashar al-Assadning Turkiya rahbariyati bilan muzokaralari “nizo sabablarini bartaraf etishga” bog‘liqligini qo‘shimcha qildi. Abdullaxon, o‘z navbatida, Eron Damashq va Anqara o‘rtasidagi muzokaralar jarayonidan mamnun ekanini aytdi.
Avvalroq Turkiyaning Hurriyet gazetasi Rossiya, Turkiya va Suriya tashqi ishlar vazirlari 14—16-yanvar kunlari Moskvada uchrashishi mumkinligi haqida xabar bergandi. Ta’kidlanishicha, tashqi ishlar vazirlari muzokaralarda Suriyadagi vaziyat, Suriya shimolidagi voqealar, terror tashkilotlariga qarshi kurash, shuningdek, qochqinlarning Turkiyaga qaytishi kabi muhim mavzularga to‘xtaladi.
Izoh (0)