“Vagner” guruhida xizmat o‘tagan yuzdan ortiq sobiq mahbuslar harbiy operatsiya zonasidan qaytib keldi, deb xabar bermoqda RT. Nashr ma’lumotlariga ko‘ra, ular afv etilgan.
Maxsus operatsiya zonasidan yetib kelgan “Vagner” jangchilari Uglegorsk IESga va Baxmut ostonalaridagi qishloqlarga hujumda qatnashgan, deyiladi xabarda.
“Men hammasini epladim. Afv etildim, biografiyamni tozaladim, mukofot oldim. Umuman olganda, nima o‘ylagan bo‘lsa, hammasiga to‘liq erishdim”, — dedi afv etilganlar qatorida jangovar harakatlar zonasidan yetib kelganlardan biri.
“Hamma narsa menga yoqdi. Ikki haftadan keyin yana ketaman. Ajoyib ish. O‘zimni, oilamni topdim, o‘rtoqlar, do‘stlar orttirdim, rahbariyat ajoyib”, — dedi RT’ning yana bir suhbatdoshi.
Avvalroq Prigojin “Vagner” xususiy harbiy kompaniyasi tarkibida Ukrainada jang qilgan mahbuslarning birinchi guruhi yarim yillik shartnoma tugaganidan keyin afv etilganini ma’lum qilgandi. “O‘z shartnomalarini sharaf bilan o‘tashdi, munosib ravishda, birinchilardan bo‘lib… Birinchilar. Shunday o‘tab berishdiki, buni ko‘pchilik eplay olmaydi… Jamoatchilik ularga juda chuqur hurmat bilan qarashi kerak, qonunlarni esa ular buzmasligi kerak”, — degan edi u.
Kreml “Vagner” jangchilarining afv etilganini rad etmadi, tasdiqlamadi ham. Rossiya prezidenti qoshidagi inson huquqlari bo‘yicha kengash a’zosi Yeva Merkacheva maxsus operatsiyada qatnashgan mahbuslar koloniyadan chiqarilishidan avval afv etilganini aytdi. Uning so‘zlariga ko‘ra, ozod etish haqidagi farmonlar maxfiylashtirilgan, chunki ular davlat siridan iborat ma’lumotlar hisoblanadi.
Izoh (0)