Soledar tuz konlaridagi tunnellar 150 metrdan 300 metrgacha chuqurlikda joylashgan va Baxmutga olib bormaydi. Bu haqda The Wall Street Journal Soledarning “Artemsol” korxonasi bosh geologi Viktoriya Skripnikka tayanib xabar berdi.
“Konlar orqali Baxmutga o‘tish yo‘li yo‘q”, — dedi u.
Skripnik kondagi tunnellar harbiy maqsadlarda foydalanilishi mumkinligiga shubha bildirdi, chunki texnika elevatorlarga sig‘maydi. Tuz qazib olish uchun qurilma pastga tushirishdan avval bo‘laklarga bo‘linadi, so‘ng konda qaytadan yig‘iladi, dedi u.
Gazeta qayd etishicha, Soledardagi tuz koni Yevropadagi eng yiriklaridan biri hisoblanadi. 2021-yilda mamlakatda tuz ishlab chiqarish hajmining 95 foizi unga to‘g‘ri kelgan. Rossiya maxsus operatsiyasi boshlanganidan keyin, aprelda konning birinchi marta yopilishi natijasida Ukrainada tuz narxi besh marotaba oshib ketgan.
7-yanvar kuni “Vagner” guruhi asoschisi Yevgeniy Prigojin Soledar va Baxmut konlari tizimi haqida gapirib berib, u “yerosti shaharlari tarmog‘i”dan iborat ekanini aytgandi. Uning so‘zlariga ko‘ra, 80—100 metr chuqurlikda nafaqat odamlar to‘plangan, balki tanklar va piyoda jangovar mashinalari ham sig‘gan. “Qurol-yarog‘ zaxiraalri esa Birinchi jahon urushidan buyon saqlanib kelmoqda”, — deya qo‘shib qo‘ygandi u.
Rossiya harbiylari 12-yanvar kuni kechqurun Soledarni to‘liq nazorat ostiga olgani haqida mamlakat Mudofaa vazirligi xabar bergandi.
“Vagner” xususiy harbiy kompaniyasi asoschisi Yevgeniy Prigojin 11-yanvarga o‘tar kechasi uning bo‘linmalari Donetsk viloyatidagi Soledar shahrini nazorat ostiga olgani haqida bayonot bergan edi. Biznesmenning matbuot xizmati u harbiylar qurshovida, go‘yoki, o‘sha shaharda qaziladigan tuz konlarida turgani aks etgan suratlarni e’lon qilgandi. Keyinroq Ukraina qurolli kuchlari Sharqiy guruhi vakili Sergey Cherevatiy Prigojinning da’volarini yolg‘on deb atadi va jurnalistlarga Bosh shtab e’lon qiladigan tafsilotlarni kutishni tavsiya qildi. Soledar — Donetsk viloyatidagi kichik shahar bo‘lib, so‘nggi vaqtlarda u uchun shafqatsiz janglar bormoqda. Uning qo‘ldan boy berilishi Ukraina qo‘shinlari uchun ancha kattaroq bo‘lgan Baxmut shahri mudofaasini qiyinlashtirishi mumkin, unga esa bir necha oylardan buyon rossiyaliklar tomonidan hujum olib borilmoqda.
Izoh (0)