Afg‘oniston milliy elektr kompaniyasi (Da Afghanistan Breshna Sherkat – DABS) O‘zbekistondan import qilinadigan elektr energiyasi texnik nosozliklar tufayli uzilganini ma’lum qildi. Bu haqda Etilaatroz xabar berdi.
Ma’lum qilinishicha, mahalliy vaqt bilan soat 16:00 atrofida O‘zbekiston hududidan import qilinadigan elektr tarmog‘i uzilgan. O‘zbekiston elektr tarmoqlari mutasaddilari muammoni tezroq hal qilishga harakat qilayotganini ta’kidlagan. Breshna kompaniyasi elektr taqchilligini tezroq bartaraf etish uchun Tojikistondan import qilinadigan 75 megavatt elektr energiyasini Kobul, Qunduz va Taxarga ulagan.
Ta’kidlanishicha, Afg‘onistonda elektr energiyasi birinchi navbatda shifoxonalar va muhim xavfsizlik idoralariga, shundan so‘ng aholi turar joylariga taqsimlanadi. Afg‘oniston ko‘proq qo‘shni davlatlar, jumladan, O‘zbekiston, Turkmaniston, Tojikiston va Erondan import qilinadigan elektr energiyasiga tayanadi.
4-dekabrda ham O‘zbekistondan Afg‘onistonga eksport qilinadigan 220 kilovatt elektr uzatish liniyalari texnik sabablarga ko‘ra uzilgandi. Kompaniya nosozlik sababli Turkmanistondan Kobulga import qilingan elektr tarmog‘iga ulanishga muvaffaq bo‘lgan.
Ma’lumot o‘rnida, O‘zbekistondan import qilinadigan elektr energiyasi Kobul hamda Parvon, Kapisa, Panjsher, Nangarhor, Lag‘mon, Logar, Paktiy, Xost, Maydon Vardak, G‘azni va Bag‘lon viloyatini elektr bilan ta’minlaydi.
Izoh (0)