«Вагнер» гуруҳида хизмат ўтаган юздан ортиқ собиқ маҳбуслар ҳарбий операция зонасидан қайтиб келди, деб хабар бермоқда RT. Нашр маълумотларига кўра, улар афв этилган.
Махсус операция зонасидан етиб келган «Вагнер» жангчилари Углегорск ИЭСга ва Бахмут остоналаридаги қишлоқларга ҳужумда қатнашган, дейилади хабарда.
«Мен ҳаммасини эпладим. Афв этилдим, биографиямни тозаладим, мукофот олдим. Умуман олганда, нима ўйлаган бўлса, ҳаммасига тўлиқ эришдим», — деди афв этилганлар қаторида жанговар ҳаракатлар зонасидан етиб келганлардан бири.
«Ҳамма нарса менга ёқди. Икки ҳафтадан кейин яна кетаман. Ажойиб иш. Ўзимни, оиламни топдим, ўртоқлар, дўстлар орттирдим, раҳбарият ажойиб», — деди RT’нинг яна бир суҳбатдоши.
Аввалроқ Пригожин «Вагнер» хусусий ҳарбий компанияси таркибида Украинада жанг қилган маҳбусларнинг биринчи гуруҳи ярим йиллик шартнома тугаганидан кейин афв этилганини маълум қилганди. «Ўз шартномаларини шараф билан ўташди, муносиб равишда, биринчилардан бўлиб… Биринчилар. Шундай ўтаб беришдики, буни кўпчилик эплай олмайди… Жамоатчилик уларга жуда чуқур ҳурмат билан қараши керак, қонунларни эса улар бузмаслиги керак», — деган эди у.
Кремль «Вагнер» жангчиларининг афв этилганини рад этмади, тасдиқламади ҳам. Россия президенти қошидаги инсон ҳуқуқлари бўйича кенгаш аъзоси Ева Меркачева махсус операцияда қатнашган маҳбуслар колониядан чиқарилишидан аввал афв этилганини айтди. Унинг сўзларига кўра, озод этиш ҳақидаги фармонлар махфийлаштирилган, чунки улар давлат сиридан иборат маълумотлар ҳисобланади.
Изоҳ (0)