Kiyev G‘arbdan og‘ir qurol-yarog‘ olganini ma’lum qildi

Ukraina o‘z ittifoqdoshlaridan og‘ir qurol-yarog‘ qabul qilishni boshlab yubordi. Bu haqda Ukraina prezidenti Vladimir Zelenskiyning ofisi rahbari Andrey Yermak o‘z Telegram-kanalida yozdi.

Uning ta’kidlashicha, Ukraina qo‘shinlariga g‘olib chiqish uchun qo‘shimcha texnika kerak. U Ukrainaning ittifoqdoshlari bundan keyin ham uni “imkoni bo‘lgan barcha usullarda” qo‘llab-quvvatlashiga ishonch bildirdi.

Kiyev qaysi mamlakatlardan aynan qanday qurol-yarog‘ olganiga Yermak aniqlik kiritmadi.

Avvalroq Polsha va Finlyandiya xalqaro koalitsiya doirasida Ukrainaga Leopard tanklarini berishga roziligini ma’lum qilgandi. NYT ma’lumotlariga ko‘ra, Yevropada hozir turli modifikatsiyali qariyb 2 mingta Leopard mavjud. Biroq Germaniyada ishlab chiqarilgan tanklarni ushbu mamlakat roziligisiz taqdim etish mumkin emas. Berlin hozircha bu masalada qaror qabul qilgani yo‘q. Bloomberg ma’lumotlariga ko‘ra, Germaniya hukumati, katta ehtimol bilan, yetkazib berishni kelasi hafta ma’qullaydi.

FT Buyuk Britaniya Ukrainaga o‘zining Challenger tanklarini yetkazib berish imkoniyatini ko‘rib chiqayotganini ma’lum qilgandi. Agar London shunday qaror qabul qilsa, Amerikaning M1 Abrams hamda Leopard tanklari ham taqdim etilishi mumkin. Berlin Ukrainaga tanklarni yolg‘iz o‘zi yetkazib bermasligi haqida ko‘p marta aytib o‘tgan.