Rossiya prezidenti Vladimir Putin Ukrainaga qarshi urushda qatnashgani uchun “Vagner” guruhi jangarisi Ayk Gasparyanni “Jasorat uchun” medali bilan taqdirladi.
Ma’lum qilinishicha, Ayk Gasparyan 2020-yilning noyabrida Rossiyada qurolli talonchilikda ayblanib, qattiq rejimdagi koloniyaga 7 yil-u 3 oyga jazo o‘tash uchun hukm qilingan. U qurol-yarog‘dan foydalangan holda bir guruh shaxslar tarkibida talonchilik sodir etganlikda aybdor deb topilgan.
2019-yilning 12-oktabr kuni Gasparyan sherigi bilan birgalikda Moskvada xorijda pul konvertatsiyasi bilan shug‘ullanayotgan shaxsga nisbatan o‘g‘rilik sodir etgan. Ular 300 ming rubl (taxminan 4 ming dollar) o‘g‘irlamoqchi bo‘lgan. Buning uchun Gasparyan qalampir gazidan foydalangan, sherigi esa travmatik to‘pponchadan erkakning boshiga o‘q uzgan.
Gasparyan jazoni Ryazan koloniyasida o‘tagan. Yangi yil arafasida Vladimir Putin Janubiy harbiy okrugi qarorgohiga tashrif buyurgan va u yerda Ukraina hududidagi urushda qatnashgan rossiyalik harbiylarga mukofotlarni topshirgan. Boshqalar qatorida Gasparyan ham medal olgan. U mukofotni Rossiya prezidenti qo'lidan qabul qilib, “Rossiya va ‘Vagner’ga xizmat qilaman” deya ta’kidlagan.
Ma’lumot o‘rnida, “Vagner” chechenistonlik mahbuslarni Ukrainaga qarshi urushga jalb qilmoqda. Ukraina Mudofaa vazirligi ularning aksariyati siyosiy mahbuslar ekanini ma’lum qilgan. “Vagner” xususiy harbiy kompaniyasi rahbari Yevgeniy Prigojin ayol mahbuslarni ham Ukrainadagi urushga yollashni qo‘llab-quvvatlagandi.
Mavzuga doir: “Vagner” guruhi Ukrainadagi urushga 40 000 mahbus yuborgani ma‘lum qilindi
Izoh (0)