Shahzoda Garri uning Afg‘onistondagi harbiy xizmat chog‘ida 25 nafar “Tolibon” a’zosini o‘ldirgani haqidagi gaplari kontekstdan yulib olinganini aytdi. Bu haqda u amerikalik boshlovchi Stiven Kolberga bergan intervyusida ma’lum qildi.
Sasseks gersogi ta’kidlashicha, kitobidan olingan parchalar kontekstdan yulib berilgan: “Shubhasiz, ular tarqatgan eng xavfli yolg‘on — men Afg‘onistonda o‘ldirgan odamlar soni bilan maqtanganim… Agar kimdir bunday narsalarni aytib maqtanayotganini eshitganimda, g‘azablangan bo‘lardim. Lekin bu yolg‘on”.
Shahzoda Garrining so‘zlariga ko‘ra, uning gaplari xavfli bo‘lmagan, lekin ularning qanday talqin qilingani hozir uning oilasi uchun xavf tug‘dirmoqda. U qariyb yigirma yil davomida faxriylar bilan ishlaganini, ular ham hech narsadan uyalmay, o‘z tajribalari haqida o‘rtoqlasha olishi uchun o‘zining harbiy xizmatdagi tajribasi haqida gapirib berganini aytdi.
“Bu tafsilotlar bilan bo‘lishish orqali, men faxriylar orasidagi o‘z joniga qasd qilish holatlari kamayishiga erishmoqchi edim”, — deya qo‘shib qo‘ydi shahzoda.
Uning aytishicha, so‘nggi bir necha kun u uchun og‘ir bo‘lgan, chunki Britaniya matbuotida tarqalib ketgan xabarlar va o‘z xotiralarining kontekstdan yulib olinishiga qarshi hech narsa qila olmagan.
11-yanvar kuni rasman nashr etilguniga qadar, Britaniya OAVlari shahzoda Garrining Spare (“Zaxiradagi”) nomli memuarlaridan parchalar e’lon qilgan edi. Unda Sasseks gersogi Afg‘onistonda xizmat o‘tash chog‘ida 25 nafar tolibni o‘ldirganini tan olgandi. Yelizaveta II ning nabirasi tan olishicha, o‘zi o‘ldirgan toliblar sonidan u uyalmaydi, ammo “mamnun ham emas”. U “Tolibon” tashkiloti a’zolariga yovuz jinoyatchilar sifatida qaragan va ular “yaxshi yigitlar”ni o‘ldirishiga yo‘l qo‘ymaslik uchun ularni yo‘q qilish kerak, deb hisoblagan. Sasseks gersogi fikricha, “Tolibon” “insoniyat dushmani” bo‘lib, ular tarixdagi eng dahshatli jinoyatlardan biri uchun javobgardir.
Shundan keyin “Tolibon” harakati vakillari shahzoda Garridan insoniyatga qarshi jinoyatlari uchun sud oldida javob berishni talab qildi.
2006-yilda Garri Sandxyorstdagi Qirollik harbiy akademiyasini tugatib, 2008-yilda o‘n hafta mobaynida Afg‘onistonning Hilmand viloyatida yashirincha jang qilgan. Shuningdek, u 2012-yilning sentabridan 2013-yilning yanvarigacha ham Afg‘onistondagi jangovar operatsiyalarda qatnashgan. O‘shanda u Apache zarbdor vertolyotida turib, isyonchilarni o‘ldirganini tan olgandi.
Izoh (0)