Janubiy Koreya, agar KXDR bilan munosabatlardagi vaziyat yomonlashsa, o‘z hududida xorijiy yadro qurolini joylashtirishi yoki o‘z yadrosini ishlab chiqishi mumkin. Bu haqda mamlakat prezidenti Yun Sok Yol ma’lum qildi, deb xabar bermoqda Janubiy Koreyaning “Newsis” axborot agentligi.
Bu haqda Yun Sok Yol Janubiy Koreya mudofaa va tashqi ishlar vazirlari bilan uchrashuvda gapirdi. Vazirlarning hisobotini tinglab, prezident Seulga hujum qilingan taqdirda “100 va hatto 1000 baravar katta ko‘lamda” javob qaytarish uchun shunday harbiy kuch yaratishni buyurdi.
“Agar Shimoliy Koreyaning yadroviy muammosi jiddiylashsa, biz Janubiy Koreyada taktik yadro qurolini joylashtirishimiz yoki o‘z yadro qurolimizni yaratishimiz mumkin”, — dedi prezident.
Uning qo‘shimcha qilishicha, bunda “real ehtimoliy variantlarni” tanlash muhim.
Yanvar oyi boshida Yun Suk Yol Seul va Vashington Amerika yadroviy qurollari ishtirokida qo‘shma mashg‘ulotlar tashkil etish imkoniyatini muhokama qilayotganini aytgandi. “Yadro qurollari AQSHga tegishli bo‘lsa-da, razvedka ma’lumotlarini almashish, rejalashtirish va mashqlar birgalikda amalga oshirilishi kerak”, — dedi u. Uning so‘zlariga ko‘ra, Vashington bu tashabbusga ijobiy qaramoqda. Mashg‘ulotlar esa Janubiy Koreyaga KXDRdan kelayotgan yadro tahdidiga tayyorgarlik ko‘rishda yordam berishi kerak.
KXDR rahbari Kim Chen In Seul va Vashington o‘rtasida qo‘shma mashg‘ulotlar o‘tkazish rejasini “katta xato” deb atadi. U Pxenyan Janubiy Koreya harbiy manyovrlariga javoban raketalar uchirayotganini aytdi. Shuningdek, uning so‘zlariga ko‘ra, Qo‘shma Shtatlar Janubiy Koreya va Yaponiya ishtirokida “NATOning Osiyo versiyasi”ni yaratishga harakat qilmoqda.
Izoh (0)