AQSH prezidenti Jo Baydenning rafiqasi Jill jarrohlik amaliyotini o‘tkazdi — birinchi xonimdan teri saratoni o‘smalari olib tashlandi. Bu haqda Associated Press prezidentning davolovchi shifokori Kevin O’Konnorning bayonotiga tayanib, xabar berdi.
Operatsiya 11-yanvar kuni Merilend shtatidagi Uolter Rid tibbiyot markazida o‘tkazildi. O’Konnorning so‘zlariga ko‘ra, u yerda birinchi xonim o‘ng ko‘zi ustidagi saraton to‘qimasini olib tashlash uchun Mosa metodidagi operatsiyadan o‘tgan.
“Biz terining ushbu sohasini parvarishlovchi muolajalarni diqqat bilan kuzatib boramiz, ammo qandaydir qo‘shimcha protseduralar talab qilinadi, deb o‘ylamaymiz”, — deyiladi shifokor hisobotida.
Bundan tashqari, operatsiyadan biroz oldin chap ko‘krakda terining saraton to‘qimalari bor bo‘lagi aniqlangan, u ham olib tashlangan. Shifokorlar, shuningdek, Bayden xonimning chap ko‘zi atrofida kichik jarohatni aniqladi, hozir bu joy tekshirilmoqda.
Jill Bayden operatsiyadan keyin “o‘zini yaxshi his qilmoqda”, deyiladi hisobotda. O’Konnor “u bir kunda Oq uyga qaytishi”ni ta’kidlagan.
AP xabariga ko‘ra, Jill Baydenning tashxisi bazal hujayrali karsinoma deb ataladi. Bu teri saratonining davolash imkoni eng yuqori bo‘lgan shakli. Saraton sekin rivojlanadi va odatda terining sirtidan boshqa to‘qimalariga tarqalmaydi — shifokorlar deyarli har doim jarrohlik yo‘li bilan butun zararlangan to‘qimalarni olib tashlashi mumkin. Bundan tashqari, kasallik kamdan-kam hollarda jiddiy asoratlarni keltirib chiqaradi yoki hayot uchun xavf tug‘diradi.
Izoh (0)