Шаҳзода Гарри Афғонистонда толибларни ўлдиргани ҳақидаги гапларини изоҳлади

Шаҳзода Гарри унинг Афғонистондаги ҳарбий хизмат чоғида 25 нафар «Толибон» аъзосини ўлдиргани ҳақидаги гаплари контекстдан юлиб олинганини айтди. Бу ҳақда у америкалик бошловчи Стивен Колберга берган интервьюсида маълум қилди.

Сассекс герцоги таъкидлашича, китобидан олинган парчалар контекстдан юлиб берилган: «Шубҳасиз, улар тарқатган энг хавфли ёлғон — мен Афғонистонда ўлдирган одамлар сони билан мақтанганим… Агар кимдир бундай нарсаларни айтиб мақтанаётганини эшитганимда, ғазабланган бўлардим. Лекин бу ёлғон».

Шаҳзода Гаррининг сўзларига кўра, унинг гаплари хавфли бўлмаган, лекин уларнинг қандай талқин қилингани ҳозир унинг оиласи учун хавф туғдирмоқда. У қарийб йигирма йил давомида фахрийлар билан ишлаганини, улар ҳам ҳеч нарсадан уялмай, ўз тажрибалари ҳақида ўртоқлаша олиши учун ўзининг ҳарбий хизматдаги тажрибаси ҳақида гапириб берганини айтди.

«Бу тафсилотлар билан бўлишиш орқали, мен фахрийлар орасидаги ўз жонига қасд қилиш ҳолатлари камайишига эришмоқчи эдим», — дея қўшиб қўйди шаҳзода.

Унинг айтишича, сўнгги бир неча кун у учун оғир бўлган, чунки Британия матбуотида тарқалиб кетган хабарлар ва ўз хотираларининг контекстдан юлиб олинишига қарши ҳеч нарса қила олмаган.

11 январь куни расман нашр этилгунига қадар, Британия ОАВлари шаҳзода Гаррининг Спаре («Захирадаги») номли мемуарларидан парчалар эълон қилган эди. Унда Сассекс герцоги Афғонистонда хизмат ўташ чоғида 25 нафар толибни ўлдирганини тан олганди. Елизавета II нинг набираси тан олишича, ўзи ўлдирган толиблар сонидан у уялмайди, аммо «мамнун ҳам эмас». У «Толибон» ташкилоти аъзоларига ёвуз жиноятчилар сифатида қараган ва улар «яхши йигитлар»ни ўлдиришига йўл қўймаслик учун уларни йўқ қилиш керак, деб ҳисоблаган. Сассекс герцоги фикрича, «Толибон» «инсоният душмани» бўлиб, улар тарихдаги энг даҳшатли жиноятлардан бири учун жавобгардир.

Шундан кейин «Толибон» ҳаракати вакиллари шаҳзода Гарридан инсониятга қарши жиноятлари учун суд олдида жавоб беришни талаб қилди.

2006 йилда Гарри Сандхёрстдаги Қироллик ҳарбий академиясини тугатиб, 2008 йилда ўн ҳафта мобайнида Афғонистоннинг Ҳилманд вилоятида яширинча жанг қилган. Шунингдек, у 2012 йилнинг сентябридан 2013 йилнинг январигача ҳам Афғонистондаги жанговар операцияларда қатнашган. Ўшанда у Апаче зарбдор вертолётида туриб, исёнчиларни ўлдирганини тан олганди.