Ukraina prezidenti Vladimir Zelenskiy Gollivud xorijiy matbuot assotsiatsiyasining “Oltin globus” mukofotlarini topshirish marosimi ishtirokchilariga atab videomurojaat yo‘lladi. U o‘z nutqida uchinchi jahon urushi bo‘lmasligini va’da qildi.
Ukraina prezidentini mehmonlarga aktyor va rejissyor Shon Penn tanishtirdi, u 2022-yilning noyabr oyida Kiyevda Zelenskiy bilan uchrashib, Ukraina haqida hujjatli film suratga olgandi.
Videomurojaati boshida Zelenskiy dastlabki “Oltin globus” 1944-yilda, Ikkinchi jahon urushi tugashiga oz vaqt qolganda topshirilganini eslatdi.
“Hali oldinda janglar va ko‘z yoshlar bor, lekin hozir shuni aniq ayta olamanki, o‘tgan yilning eng yaxshi odamlari — bu siz. Erkin dunyoning ozod odamlari. Ozodlik uchun umumiy kurashimizda ozod Ukraina xalqini qo‘llab-quvvatlash atrofida birlashganlar... Birinchi jahon urushi millionlab insonlarning hayotiga zomin bo‘ldi. Ikkinchi Jahon urushi o‘n millionlab odamlarni olib ketdi. Uchinchi jahon urushi bo‘lmaydi, bu trilogiya emas”, — dedi prezident.
Mart oyida The New York Post gazetasi Zelenskiy “Oskar” topshirish marosimida nutq so‘zlashga tayyorlanayotgani va Penn uning vakili bo‘lishi kerakligi haqida xabar bergandi. Biroq tashkilotchilar Ukraina prezidentiga so‘z berish va mukofotning siyosatga aralashishi to‘g‘rimi yoki yo‘qligi borasida bir qarorga kela olmagan.
Noyabr oyida Ukrainaga tashrifi chog‘ida Penn Kiyevni qo‘llab-quvvatlash belgisi sifatida o‘zining “Oskar” haykalchasini Zelenskiyga topshirgan edi. Rossiya Tashqi ishlar vazirligi esa aktyorning mamlakatga kirishini taqiqlab, uni qora ro‘yxatga kiritdi.
Izoh (0)