Зеленский учинчи жаҳон уруши бўлмаслигини ваъда қилди

Украина президенти Владимир Зеленский Голливуд хорижий матбуот ассоциациясининг «Олтин глобус» мукофотларини топшириш маросими иштирокчиларига атаб видеомурожаат йўллади. У ўз нутқида учинчи жаҳон уруши бўлмаслигини ваъда қилди.

Украина президентини меҳмонларга актёр ва режиссёр Шон Пенн таништирди, у 2022 йилнинг ноябрь ойида Киевда Зеленский билан учрашиб, Украина ҳақида ҳужжатли фильм суратга олганди.

Видеомурожаати бошида Зеленский дастлабки «Олтин глобус» 1944 йилда, Иккинчи жаҳон уруши тугашига оз вақт қолганда топширилганини эслатди.

«Ҳали олдинда жанглар ва кўз ёшлар бор, лекин ҳозир шуни аниқ айта оламанки, ўтган йилнинг энг яхши одамлари — бу сиз. Эркин дунёнинг озод одамлари. Озодлик учун умумий курашимизда озод Украина халқини қўллаб-қувватлаш атрофида бирлашганлар... Биринчи жаҳон уруши миллионлаб инсонларнинг ҳаётига зомин бўлди. Иккинчи Жаҳон уруши ўн миллионлаб одамларни олиб кетди. Учинчи жаҳон уруши бўлмайди, бу трилогия эмас», — деди президент.

Март ойида The New York Post газетаси Зеленский «Оскар» топшириш маросимида нутқ сўзлашга тайёрланаётгани ва Пенн унинг вакили бўлиши кераклиги ҳақида хабар берганди. Бироқ ташкилотчилар Украина президентига сўз бериш ва мукофотнинг сиёсатга аралашиши тўғрими ёки йўқлиги борасида бир қарорга кела олмаган.

Ноябрь ойида Украинага ташрифи чоғида Пенн Киевни қўллаб-қувватлаш белгиси сифатида ўзининг «Оскар» ҳайкалчасини Зеленскийга топширган эди. Россия Ташқи ишлар вазирлиги эса актёрнинг мамлакатга киришини тақиқлаб, уни қора рўйхатга киритди.