Qozog‘istonda noqulay ob-havo tufayli yo‘lda qolib ketgan ikki avtobusdan 70 ga yaqin o‘zbekistonlik evakuatsiya qilindi

Qozog‘istonning Samara—Chimkent avtomobil yo‘lida 11-yanvar kuni ichida jami 69 nafar O‘zbekiston fuqarosi bo‘lgan ikki avtobus noqulay ob-havo tufayli yo‘lda qolib ketdi. Respublika Favqulodda vaziyatlar vazirligining xabar berishicha, 72 kishini olib ketayotgan birinchi avtobus yo‘lovchilari maktabga evakuatsiya qilingan.

“Avtobusda 3 nafar Qozog‘iston va 38 nafar O‘zbekiston fuqarosi bo‘lgan. Noqulay ob-havo oqibatida yo‘l to‘silib qolgani sababli barcha yo‘lovchilar Irg‘iz qishlog‘idagi umumta’lim maktabiga joylashtirildi”, — deyiladi vazirlik xabarida.

O‘sha kuni Aytekebiy tumanida, Samara-Chimkent avtomobil yo‘lining 968-kilometrida yana bir yo‘lovchi avtobusiga yordam zarurligi haqida ma’lumot kelib tushgan. Avtobusda jami 31 nafar O‘zbekiston respublikasi fuqarolari bo‘lgan.

Noqulay ob-havo hamda yo‘l yopilgani sababli barcha yo‘lovchilar Qorabutak qishlog‘i masjidiga joylashtirildi.

Qozog‘iston Favqulodda vaziyatlar vazirligi fuqarolarga ob-havo o‘zgarishlarini kuzatishni, havo yomonlashib, yo‘llarda avtotransport vositalarining harakatiga cheklovlar joriy etilsa, ko‘chaga chiqmaslikni qat’iy tavsiya qilmoqda.