Afg‘onistonda “Tolibon” rahbariyati ayollar uchun go‘zallik salonlarini yopishga qaror qilgani haqida OAVda tarqalgan xabarlar haqiqatga to‘g‘ri kelmaydi. Bu haqda “Tolibon”ning Dohadagi siyosiy idorasi rahbari Muhammad Suhayl Shoxin jurnalistlarga ma’lum qildi.
“Bu haqiqatdan yiroq, tegishli hukumat bu da’voni rad etadi”, — dedi u.
10-yanvar kuni ertalab Al-Arabia telekanali manbalarga tayanib, “Tolibon” rahbariyati Afg‘onistonda ayollar uchun go‘zallik salonlarini yopishga buyruq bergani haqida xabar bergandi. Manbalarga ko‘ra, “Tolibon” tomonidan tuzilgan Afg‘oniston muvaqqat hukumati o‘n kunlik muddat belgilagan, shundan so‘ng go‘zallik salonlari yopilishi kerak. Bundan tashqari, toliblar qizlarning savdo markazlarida ishlashini taqiqlagani aytilmoqda.
2021-yilda hokimiyatga kelganidan beri “Tolibon”, ularning nazdida islomiy qadriyatlarga xos cheklovlarni joriy qilmoqda. Xususan, ular ayol teleboshlovchilarga hijob o‘rashni majburiy qildi, ayol aktrisalar ishtirokidagi dramatik filmlar va ko‘rsatuvlar namoyishini taqiqladi.
Afg‘onistonda ayollarning istirohat bog‘lariga borishi ham taqiqlangan. Ayol va qizlarning ishlashi hamda ta’lim olishi ham “Tolibon” tomonidan cheklangan.
Izoh (0)