Yaponiyaning Nara prefekturasi prokuraturasi mamlakat sobiq bosh vazir Sindzo Abeni o‘ldirishda ayblanayotgan Yaponiya o‘z-o‘zini himoya qilish kuchlarining 42 yoshli sobiq dengizchisi Tetsuya Yamagamini aqli raso deb topdi, qaror psixiatrik ekspertizadan so‘ng qabul qilindi. Bu haqda tergovga yaqin manbalarga tayanib, TBS telekanali xabar berdi.
Gumonlanuvchi yaqin kunlarda yopiq tibbiy muassasadan Nara shahar politsiyasi qamoqxonasiga o‘tkaziladi, deya aniqlik kiritdi telekanal.
Sindzo Abe 2006–2007 va 2012–2020-yillarda Yaponiya bosh vaziri bo‘lgan. 2022-yil 8-iyul kuni Abe Nara shahrida Liberal-demokratik partiyani qo‘llab-quvvatlash uchun nutq so‘zlayotganida Yamagami unga ikki marta o‘q uzgan.
Abe ko‘krak va bo‘ynidan yaralangan. Sobiq bosh vazir zudlik bilan kasalxonaga yotqizildi, ammo uni saqlab qolishning iloji bo‘lmadi. Yamagami hibsga olindi va psixiatrik tekshiruvga yuborildi.
Yamagami qotillikdagi aybini tan oldi. Hibsga olingan shaxs o‘z harakatini Abe siyosatidan noroziligi bilan izohlagan. Keyinchalik u Abeni qandaydir guruhga aloqador deb hisoblaganini tushuntirdi. Yamagami onasi o‘sha guruhga pul xayriya qilganidan keyin ularning oilasidagi munosabatlar yomonlashganini aytdi. Kyodo agentligining yozishicha, gap Yamagamining onasi 100 million iyen (720 ming dollar) xayriya qilgan “Birlashish cherkovi” sektasi haqida ketmoqda.
Izoh (0)