O‘tgan hafta suiqasd oqibatida halok bo‘lgan Yaponiya sobiq bosh vaziri Sindzo Abe o‘limidan keyin Yaponiyaning eng faxriy davlat mukofoti — Xrizantema oliy ordeni bilan taqdirlanadi, deb yozadi “RBK”.
Kyodo nashri ma’lumotlariga ko‘ra, qaror mamlakat vazirlar mahkamasi majlisida qabul qilingan. Abega zanjirli Xrizantema oliy ordeni beriladi — Yaponiyada bunday orden bilan faqat vafotidan keyin mukofotlanadi.
Xrizantema oliy ordeni 1876-yilda imperator Meydzi tomonidan ta’sis etilgan. Shundan buyon u bilan Yaponiyaning barcha imperatorlari mukofotlanib kelgan.
Shuningdek, orden chet el qirollik oilasi a’zolari va xorijlik siyosiy arboblarga ham berilgan. Orden kavalerlari orasida AQSH sobiq prezidenti Ronald Reygan, Britaniya shahzodasi Charlz, shuningdek, Ukraina sobiq prezidenti Viktor Yanukovich bor.
Sindzo Abe 8-iyul kuni o‘ldirildi. Qotil u Nara shahrida Liberal-demokratik partiyani qo‘llab-quvvatlab nutq so‘zlayotgan paytda uni orqadan nishonga oldi. Shifokorlar so‘zlariga ko‘ra, siyosatchi bo‘ynining o‘ng qismidan, shuningdek, yuragidan yaralangan. Bir necha soatdan keyin u kasalxonada vafot etgan.
Hujumda gumonlanuvchi 41 yoshli Tetsuya Yamagami voqea joyida politsiya tomonidan qo‘lga olindi, undan qo‘lbola quroli musodara qilindi. U qarshilik ko‘rsatmadi va keyinroq o‘z qilmishiga iqror bo‘ldi. Uning so‘zlariga ko‘ra, Abe “allaqanday guruh” a’zosi bo‘lgan, u esa ushbu guruhga nafrat tuyg‘usini his qilgan va shu sababli sobiq bosh vazirga hujum qilishga qaror qilgan. So‘roq chog‘ida Yamagami aniqlik kiritishicha, uning onasi ushbu guruhga aralashib qolgan va pullarini unga xayriya qilgan, shundan keyin oiladagi munosabatlar buzilgan. Avvalroq esa u Abening siyosatidan norozi bo‘lgani tufayli, uni o‘ldirishga qaror qilganini aytgandi.
Mavzuga doir:
Izoh (0)