Генрал-полковник Александр Лапин Россия Қуролли кучлари Пиёда қўшинлари Бош штаби бошлиғи этиб тайинланди. Бу ҳақда «РБК» Россия Мудофаа вазирлигидаги манбасига таяниб хабар берди. Тайинлов ҳақида аввалроқ «Ura.ru» нашри ҳам хабар берганди.
Кремль вакили Дмитрий Песков генерал Лапиннинг бу лавозимга тайинлангани ҳақидаги хабарларни тасдиқламади ва рад этмади ҳам. «На тасдиқлай оламан, на рад эта оламан. Президентнинг баъзи фармонлари очиқ, баъзилари эса махфий белгиси остида бўлади. Эълон қилинаётган фармонлар орасида бундай ҳужжат йўқ эди», — деди у.
2017 йилдан буён Лапин Россия Марказий ҳарбий округига қўмондонлик қилиб келганди. 2022 йил октябри охиригача у Луганск вилоятини босиб олган «Марказ» қўшинлар гуруҳи қўмондони лавозимини ҳам эгаллаган. Ноябрда Марказий ҳарбий округ қўмондони вазифаларини вақтинчалик бажарувчи этиб генерал Александр Линков тайинлангани маълум бўлди.
Кузда Лапин Чеченистон раҳбари Рамзан Қодиров томонидан фаол танқид қилина бошлаганди, хусусан, у генерални Лиманни қўлдан бой беришда, Украина қуролли кучлари фронт участкаларидан бирига бостириб киришида айблаб, уни «уқувсиз» деб атаганди. Қодировнинг позициясини «Вагнер» гуруҳи асосчиси Евгений Пригожин очиқчасига қўллаб-қувватлаганди.
Изоҳ (0)