O‘zbekistonda tibbiyotni raqamlashtirishga Turkiyadan yetakchi mutaxassislar jalb qilinadi

O‘zbekiston sog‘liqni saqlash vaziri Amrillo Inoyatov Turkiya sog‘liqni saqlash vaziri o‘rinbosari Shuayib Birinji bilan videomuloqot o‘tkazdi.

Turkiya sog‘liqni saqlash vaziri o‘rinbosari bilan videomuloqotda tibbiyot sohasi bo‘yicha ikki tomonlama hamkorlikni rivojlantirish masalalari muhokama etildi.

O‘zbekistonda xalqaro tajriba asosida davlat tibbiy sug‘urtasi tizimini bosqichma-bosqich joriy etishga kirishilgan. Birinchi bosqich sinov tariqasida Sirdaryo viloyatida amalga oshirilyapti. 2023-yildan boshlab bu mexanizm Toshkent shahrida ham yo‘lga qo‘yladi. Shuningdek, yangi tizim Navoiy viloyatida tatbiq etilishi rejalashtirilgan.

Ana shu islohotlar samaradorligini oshirish maqsadida Turkiyadan eng tajribali mutaxassislarni O‘zbekistonga jalb qilish maqsad qilingan. Shu bilan birga, tibbiyot klasterlari faoliyatini yo‘lga qo‘yish va rivojlantirish, kadrlar tayyorlash tizimiga ilg‘or o‘qitish metodikalarini tatbiq etish masalalari yuzasidan fikr almashildi.

Muloqot davomida Turkiya sog‘liqni saqlash vaziri o‘rinbosari yuqorida keltirilgan yo‘nalishlarda O‘zbekiston bilan o‘z tajribalarini almashishga tayyor ekanini ma’lum qildi. Tomonlar kelishuviga muvofiq, yaqin kunlarda turkiyalik yetakchi mutaxassislar mamlakatga tashrif buyuradi. Ular sohani raqamlashtirish, tibbiy sug‘urta tizimini keng joriy etish, tibbiyot klasterlari faoliyatini yo‘lga qo‘yish va rivojlantirish jarayoniga yaqindan ko‘maklashadi.