Самарқанд вилоятининг Оқдарё туманидаги уйда эр-хотин ва уларнинг беш ойлик фарзанди ўлик ҳолда топилди. Бу ҳақда «Дарё»га Бош прокуратура матбуот хизмати хабар берди.
Маълум қилинишича, 2022 йил 24 декабрь куни соат 23:22 да Оқдарё туман тиббиёт бирлашмаси тез тиббий ёрдам бўлимининг Самарқанд вилоят ИИБ 102 операторига берган хабарига кўра, тез ёрдам чақирувига асосан Оқдарё тумани «Галаравот» маҳалласида яшовчи фуқаро А.А.нинг уйига борилганда, ушбу хонадон эгаси, унинг турмуш ўртоғи М.А. ва уларнинг беш ойлик ўғли М.П.нинг жасади топилган.
Мазкур хабарга асосан тергов-тезкор гуруҳи аъзолари томонидан ҳодиса жойи кўздан кечирилганда аёлнинг бўйин соҳаси чап ён томонида икки дона санчиб-кесилган жароҳати билан, ёшга тўлмаган бола тан жароҳатсиз ҳамда хонадон эгаси ушбу ҳовлининг оғилхонаси чердак қисмига арқон билан бўйнидан осилган ҳолатда топилган.
Дастлабки тезкор маълумотлар ҳамда гувоҳларнинг кўрсатувларига кўра, А.А. аёли билан оилавий келишмовчилик оқибатида жанжаллашиб, уни қайчи билан бўйин соҳасига икки марта уриб ўлдириб, сўнгра бешикда ётган беш ойлик фарзандини қўллари билан бўғиб ўлдириб, кейин ўзини ўзи осиб, ўз жонига қасд қилган.
Республика шошилинч тиббий ёрдам илмий маркази Самарқанд филиалининг дастлабки маълумотномасида, 21 ёшли марҳума М.А.нинг ўлими бўйин соҳаси чап ён томонида икки дона санчиб-кесилган жароҳати натижасида, беш ойлик М.П.нинг ўлими бўғилиши натижасида нафас етишмовчилигидан, ҳамда 28 ёшли А.А.нинг ўлими бўйнидан арқон билан осилишида механик асфиксиядан келиб чиққани кўрсатилган.
Айни пайтда ҳолат юзасидан Жиноят кодексининг 97-моддаси иккинчи қисми «а» ва «в» бандлари (икки ёки ундан ортиқ шахсни, айбдорга аён бўлган ожиз аҳволдаги шахсни қасддан ўлдириш) билан жиноят иши қўзғатилган, дастлабки тергов ҳаракатлари олиб борилмоқда.
Изоҳ (0)