Владимир Путиннинг Рождество кунида ярашув режимини жорий қилиш ҳақидаги таклифи — нафас ростлаб олиш учун имкониятга эга бўлишга уриниш, деди АҚШ президенти Жо Байден журналистнинг саволига жавоб бераётиб.
«Путин айтаётган гапларга жавоб бериш истагида ёнаётганим йўқ… Менинг фикримча, у бироз тоза ҳаводан нафас олмоқчи», — деди Байден.
Россия президентининг ташаббусини Жо Байден «ғалати» деб атади ва Россия томонини Янги йилда Украина фуқаролик инфратузилмасига зарбалар беришда айблади.
Россия Мудофаа вазирлиги 31 декабрь куни Украинанинг Россия ҳудудига ҳужум қилишда фойдаланиладиган «зарбдор учувчисиз учар қурилмалар тайёрлашда иштирок этувчи мудофаа-саноат мажмуаси объектлари»га ҳамда улар сақланадиган ва учириладиган жойларга зарбалар берилганини маълум қилганди.
Аввалроқ Украина президенти Владимир Зеленский Россия шу баҳона остида Украина ва Европага қарши «тажовузнинг янги тўлқини»га тайёрланаётганини айтганди.
Дастлаб Рождество муносабати билан ярашувни патриарх Кирилл таклиф қилганди. Путин шундна кейин жанговар тўқнашувлар чизиғи бўйлаб ўт очишни тўхтатиш режимини жорий қилишни буюрди ва Украина томонини ҳам шундай қилишга чақирди. Россия Мудофаа вазирлиги топшириқни бажаришни бошлаганини маълум қилди. Украина ҳукумати дастлаб ташаббусга ишончсизлик билан қаради. Хусусан, Украина президенти офиси раҳбари маслаҳатчиси Михаил Подоляк таклифни «сурбетларча қурилган қопқон ва пропаганда» деб атади. Ташқи ишлар вазири Дмитрий Кулеба Киев ташаббусни жиддий қабул қилмаслигини айтиб, Зеленский аввалроқ «ўнта қадамдан иборат аниқ-равшан тинчлик формуласини таклиф этгани»ни эслатди. Европа ташқи сиёсаий хизмати расмий вакили Петер Стано Евроиттифоқ эълон қилинган ўт очишни тўхтатишга ишонч билан қарамаслигини айтди. Унинг фикрича, бу «Россиянинг захираларни тўлдириш, қўшинларини қайтадан гуруҳлаш ёки путур етган халқаро обрўсини қайта тиклашга уринишига ўхшайди». БМТ бош котиби вакили Стефан Дюжаррик ташкилот жанговар ҳаракатларни тўхтатиш эҳтимолини доим олқишлашини айтди. Шу билан бирга, у БМТ «бу урушнинг халқаро ҳуқуқ ва БМТ уставига мувофиқ якунланиши» тарафдори эканини таъкидлаб, ташкилот бу мақсадга эришишда кўмак кўрсатишга тайёрлигини билдирди. Шунга қарамай, бир томонлама сулҳ режими Россия кучлари томонидан жорий қилинади. Мамлакат Мудофаа вазирлиги хабарига кўра, Путиннинг таклифи билан Россия қўшинларига 6 январь 12:00 дан 7 январь 24:00 га қадар ўт очишни тўхтатиш режимини киритиш буюрилган.
Изоҳ (0)