Eron hukumati mamlakatda avj olgan jazirama tufayli elektr energiyasi iste’molini kamaytirish maqsadida bir qator davlat idoralarini vaqtincha yopishga qaror qildi. Bu haqda mahalliy nashrlarga tayanib, Al Arabiya xabar berdi.
Ma’lumotlarga ko‘ra, ertaga, 6-avgustdan boshlab mamlakatdagi 31 ta provinsiyadan kamida 15 tasida davlat muassasalari to‘liq yopiladi yoki qisqartirilgan ish jadvalida faoliyat yuritadi. Ushbu hududlar orasida G‘arbiy Ozarbayjon, Ardabil, Hormozg‘on va Alborz provinsiyalari hamda poytaxt Tehron bor.
Tehron gubernatori Muhammad Sodiq Motamediyan davlat telekanaliga bergan bayonotida bu qaror Energetika vazirligining iltimosiga binoan qabul qilinganini bildirgan. U bu choralar suv hamda elektr sohasida energiya sarfini boshqarishga yordam berishini ham ta’kidlagan.
Iyul oyida boshlangan kuchli jazirama Eron energetika tizimiga jiddiy bosim o‘tkazmoqda. Janubiy hududlarda harorat +50 darajadan oshgani tufayli elektr mamlakat bo‘ylab navbatma-navbat va jadval asosida ma’lum vaqtga uzib qo‘yilmoqda.
Bundan tashqari, suv omborlaridagi suv sathi pasayib borayotgani sababli Tehronda ichimlik suvi bosimi ham kamaytirilgan. Mahalliy OAV buni “so‘nggi yuz yillikdagi eng dahshatli qurg‘oqchilik” sifatida baholagan.
Izoh (0)