“Jahongir aka bilan ishlash boshqa rahbarlarga nisbatan judayam oson” — Sergeli hokimi Ortiqxo‘jayev haqida

Sergeli tumani hokimi Elbek Shukurovning aytishicha, Toshkent shahri hokimi Jahongir Ortiqxo‘jayev bilan ishlash hokim sifatida judayam oson va qulay. Boisi Toshkent shahri hokimida ortiqcha rasmiyatchilik, byurokratiya yo‘q. Hokim bu haqda “Daryo” nashri jurnalisti bilan bo‘lgan suhbatida gapirib berdi.

Jahongir aka ishlash, ishlash mumkin bo‘lgan rahbarlar orasida eng osoni deb o‘ylayman. Bilasiz, u kishi aslida tadbirkorlikdan chiqqan hokim. Shu sababmi u kishida ortiqcha rasmiyatchilik, byurokratiya yo‘q, — deydi Elbek Shukurov.

Sergeli tumani hokimining fikricha, Toshkent shahri hokimi Jahongir Ortiqxo‘jayev jurnalist va blogerlar uchun ham doimo ochiq.

O‘zlaringiz ham ko‘p bora ko‘rgansizlar, kuzatgansizlar Jahongir aka aksariyat hollarda, umumiy olganda jurnalist va blogerlar uchun juda ochiq rahbar. Tan olish kerak u kishidagi o‘ta ochiqlik ba’zi holatlarning kelib chiqishiga sabab ham bo‘lgan. Xullas, Jahongir akadagi ochiqlik va samimiylikni ko‘rib, u kishi bilan ishlayotganimdan xursand bo‘laman, — deydi Elbek Shukurov.

Ijtimoiy tarmoqlardagi faolligimiz borasida gapiradigan bo‘lsak, bu — Jahongir akaga qay darajada ma’qul keladi yoki ma’qul kelmaydi, buni aniq bilmayman, boisi yoqadi yoki yoqmaydi, chiq yoinki chiqma degan gapni eshitmaganman. Bu haqda munosabat bildirmagan. Lekin tan olish kerak, Jahongir akadan gap eshitgan paytlarim bo‘lgan. U paytda hokim o‘rinbosari sifatida ishlardim va ba’zi aytgan gaplarim ommalashib ketganda “ijtimoiy tarmoqlarda judayam oshirib yuborasan-da, kamerani yaxshi ko‘rasan-da”, degandilar. To‘g‘risi, u payt o‘zim ham xato qilganman va to‘g‘ri tanbeh eshitganman, — deydi Sergeli tumani hokimi.